Palpak ni Digal

Akoy gikuyawan niining klarong palpak sa kapolisan sa pag-handle sa kasong pagdagit ug pagpatay sa inosenteng 6-anyos nga si Ellah Joy Pique didto sa barangay Calajo-an, Minglanilla niadtong Pebrero 8 sa hapon.

Una nakong gikahadlokan nga dugay na nga nakaikyas ang tinuod nga criminal, nag-ngisi nga nag-monitor sa mga balita nga sayop ang gipik-ap ug gipasakaan og kaso sa kapolisan.

Ikaduha nakong gikahadlokan mao ang balos unya ni Sven Erik Berger tungod sa pagka-ulaw ni Cebu Provincial Police Office director Erson Digal ug sa mga sakop niya, pagpamugos og duot kaniya ug sa iyang uyab nga si Karen Esdrelon sa krimen nga wala nila himo-a.

Pagkataas sa panahon nga gi-usik-usikan sa kapolisan sa CPPO sa ilang pagduot kang Berger ug kang Esdrelon, unya sa kaulahian, mitukma ra diay ang ilang mga “alibi” aron paglimpyo sa ilang ngalan sa kamatayon ni Ellah Joy.

Kadtong mga panahona igo kaayo nga magamit sa tinuod nga kriminal paghimo og mga pamaagi aron maka-eskapo nga dili mabatyag sa mga awtoridad nga bisi kaayo og yampungad sa mga tawo nga dili mao.

Ang dakong sayop sa kapolisan nagdali-dali sila sa pag-conclude nga sulbad na ang krimen.

Niadtong Pebrero 14, si Digal mismo ang miingon sa dihang nahinabi sa mga tigbalita nga gikonsiderar na nila ang kaso nga “closed” nga sa ato pa, sulbad na, tungod sa pag-hold nila kang Berger ug Esdrelon nga gi-hold sa immigration office sa Mactan Cebu International Airport niadtong Pebrero 12 samtang mopaingon unta sila sa Hong Kong aron adto mag-date sa pagsaulog sa Valentine’s Day.

Apan niadto lang miaging semana gipagawas sa National Bureau of Investigation (NBI-7) ang mga print-out sa footages sa hotel nga ilang gi-check-inan nga nagsuporta sa ilang pamahayag nga imposible nga sila ang midagit lang Ellah Joy kay didto ra man sila sa hotel sa oras kanus-a gidagit ang bata sa usa ka Amerkanohon ug sa usa ka babaye nga nagsakay og SUV.

Mao kadto ang nakadaot ni Digal kay wala gyud niya susiha ang mga footages sa hotel aron iyang ma-verify ang mga pamahayag ni Berger ug Esdrelon. Ambot, nagdali tingale sa reward money nga gisaad sa mga konsehal sa Minglanilla (hehehe!).

* * *

Ang lain nakong gikahadlokan mao ang panimalos unya ni Berger sa Pilipinas, dili lang kang Digal ug sa mga pulpol nga mga polis sa CPPO.

Gikuyawan ko kun adto mosabwag si Berger sa pait niyang kasinatian dinhi sa Cebu ngadto sa international community.

Mabutang kita sa kaulawan kun himuon kini ni Berger. Ug dili ko mobasol niya niini tungod sa kalangay, gasto, ug kaulawan nga nahiagoman tungod lang sa kabulay-og ni Digal ug sa kapolisan sa probinsiya.

Ang “investigative capability” sa atong PNP ang mabutangan sa dakong question mark sa international community tungod kay mao kini ang makapahadlok sa mga langyaw nga moanhi dinhi sa Pilipinas kay simbako og akusahan sila og krimen nga wala nila buhata.

Kining pagdesider ni Berger nga dili na lang mopasaka og kaso kang Digal bantayanan kaayo kini.

Basin og misantop sa iyang hunahuna nga dili man gani kasaligan ang kapabilidad sa kapolisan sa pag-imbestigar og krimen, unsa na kaha ang pagpaminaw sa kaso sa atong korte dinhi.

Kay wala man siyay legal action batok kang Digal, sa kapolisan ug sa mga opisyal sa immigration nga mi-hold kaniya bisan walay hold departure order ug walay warrant of arrest, kuyawan ko kun adto kini sa international court mangayo og danyos.

* * *

Naglibog ko nganong gusto pa nga luwason sa Pilipinas ang tulo ka Pilipino nga anaa sa death row sa China tungod sa kasong pagdala og drugas sa maong nasud.

Aduna pa untay daghang mga OFW sa ubang nasud nga luwasonon tungod kay napriso sa gipahid nga salaod nga wala nila mahimo ug kadtong nagpait ang pagpuyo tungod sa abuso sa mga amo, apan wala gyuy aksyon ang gobyerno niini.

Angay ipatagam sa ubang mga Pilipino nga nagpadayon pa sa pagpakig-abin sa mga international drug syndicate ang nahiagoman nilang Ramon Credo, Sally Ordinario Villanueva ug Elizabeth Batain didto sa China nga bitayonon tungod sa pagdala og drugas sa maong nasud.

Nagtuo ko nga aduna pa gyuy pipila ka mga Pilipino nga wala pa motagam niining trabahoa bisan risgo kaayo kini sa mga awtoridad sa mga nasud sa gawas.

Hangtod karon, padayon ko nga supak sa lakang sa Pilipinas pagluwas nilang Credo, Villanueva ug Batain gikan sa bitayanan sa China tungod kay drugas ang gikalambigitan nilang kaso.

Nasayod na kita nga kining drugas maoy usa sa hinungdan sa pagkabuang sa kabatan-onan, nga kadaghanan kanila wala na makatiwas sa pagtungha tungod sa pagkayabag sa drugas ug daghan kanila ang nahimong kriminal tungod niini.

Dugay na nga nahibaw-an sa gobyerno nga mga African ang nalambigit niining maong sindikato, apan kagahapon lang mimando si Pres. PNoy Aquino ngadto kang Justice Secretary Leila de Lima sa pagsuhid sa mga lugar hain magpuyo ang mga Nigerian ug uban pang mga African aron pagsota kun unsay ilang tuyo sa pagpuyo niini.

Samtang mituo usab ako nga adunay mga sakop sa international drug syndicate nga mogamit og mga pamaagi aron makahaylo og mga Pilipino paghimo nilang drug courier pinaagi sa mga placement agency ug sa fake marriages.

Kaniadto ra kini, apan ang administrasyon ra ni Aquino ang naka-ako pagsugod sa pagsusi niini.

Magduda lamang usab hinuon kita nga hasta ang drugas giapilan sa mga kurakot nga mga opisyal sa miaging administrasyon.