Namasilong lang

Usa ka kauwanon nga gabii dili pa lang dugay, dihay daghang mga way kapuy-an (homeless) nga tawo ang namasilong sa skywalk kon overpass diha sa may Fuente Osmeña.

* * *

Mga alas onse ka kadto ug ang uban kanila miplastar na sa ilang karton nga gihimong banig. Nangatog na. Walay habol-habol nga mohatag kanila og kainit taliwa sa katugnaw sa kagabhion.

* * *

Taud-taod dihay duha ka tawo nga nagkapote. Giabog ang mga pobreng namahuway sa skywalk. Suma pa sa atong tinubdan, ang usa ka tawo nga nagkapote mipatid sa mga nangatog nang mga bata.

* * *

Namahawa ang mga “pobreng kabus.” Namalhin tingali sa laing skywalk wa gamita sa katawhan diin minilyon ang gigasto sa pagtukod.

* * *

Opinyon sa usa ka pedestrian: “Di ba maayo unta nga gipasagdan ra tong mga namasilong ug nangatog na kay total wa naman pedestrian nga mangagi adtong orasa?”

* * *

Yes, unta to. Kun siya pahusgahon. Apan mga otoridad man ang nangabog. Wa ambot otoridad ba kadto. Usahay gud di na man lang ta makaila (distinguish) kon otoridad ba ang usa ka tawo o bugoy nga nagpaka-otoridad.

* * *

Ang atong mga skywalk nahimo nang dangpanan sa mga homeless tang kaigsuonan atol sa dautang panahon. O bisan dili pa gani dautan ang panahon. Nahimo na nila kini nga dormitoryo.

* * *

TRIVIA -- Hello diha sa atong mga suking magbabasa sa Liloan public market. Daghan kaayong salamat sa inyong suporta.