"Another Filipino woman saved from poverty"

Giistorya ni sa akong amigo, iya kono ning nabasahan likod sa T-shirt gisul-ob sa usa ka Pinay nga gikakuyog sa usa ka langyaw. Lagmit nangomedya lang siya. Kay kinsa gong bayhana ang ganahan mosul-ob ini? Besides di sad tingali mosugot ang foreigner nga magsul-ob niini ang iyang kuyog.

Anyway, sukad adto, matagkakita nakog Filipino woman nga itakintakin sa langyaw, makaingon kos akong kaugalingon: Laing Filipino woman nga nasalbar gikan sa kawad-on. Morag insulto no? Insulto sa atong kababayen-an.

Anyway, whatever, makapalambo kini sa atong turismo. Makapasulod og dugang dolyar. Ug nakatampo sa poverty alleviation program sa atong gobyerno. 

* * *

Karon, nagplano na ang mga local government units unsaon pagsanta sa baha!

Very good. Apan, mao pay ilang pagplano? Sa ato pa, kun waa pa ang miaging baha, di gyud sila magplano?

Tan-aw nako, resulta kini sa dugay’ng katuigan natong pagpabaya. Wala kitay laing kapasanginlan kondili ang atong kaugalingon. Dili nato mapasangil totally ang gobyerno kay dili nila maato pagbantay ang mataglihok sa matag tawo.

Pananglitan, dili nato mapaabot sila si Mayor Mike Rama, Jonas Cortes, ug Soc Fernandez nga mag-apong sa mga sapa, magbantay nga dili labayan og basura. Dili sad ta kapaabot ni Gov. Gwen nga did-an ug pugngan niya ang tanang nagpuyo sa mga lungsod pagbiya sa ilang mga pinuy-anan aron mag-squatter dinhi sa dakbayan.

Gani, kanang giingon nga mga illegal structures, sama nianang kabalayan daplin sa sapa, dili sayon ang pagpapahawa kanila, tungod kay alang nila, asa man sila paingon?

Sa ato pa, kitang mga molupyo mismo maoy nagmugna sa problema – in most instances, kita mismo mao ang problema. Ug dili kini sayon sulbahon sa gobyerno. Kinahanglan, una sa tanan, kita maoy unang mosulbad sa problema. Dili nato isangon ang tanan ngadto sa gobyerno.

* * *

Lainlain lang gyud og abilidad o kabuang ang tawo. Ambut kun nakakita ba mo sa Internet, diin usa ka tawo, miuban pag-dunk sa bola. Iyang gi-dunk ang bola, unya miuban siya paglusot sa ring, una ang ulo. Wala siya maunsa, kalma kaayong milakaw tapus sa iyang pag-dunk. Kahimo ka ini, Dro?