CEBU, Philippines - Alang kanako angay g’yud nga mohipos pa og dugang ebidensya ang kapolisan aron imatuod nga ang dinakpan nga Norwegian national ug ang iyang Filipina girlfriend maoy responsable pagdagit ug pagpatay sa sayes-anyos nga si Ellah Joy Pique.
Samtang mahimo ra nga dawaton sa hukmanan ang kaso kay duna may tulo ka bata nga mitistigos nga sila mao kadtong mga midagit ni Ellah Joy, apan aron mawagtang g’yud ang pagduha-duha sa katawhan angay’ng kuhaon pa sa kapolisan ang dugang kamatuoran.
Pagka karon gud, pwerteng daghana nga nagduda nga ang duha ka dinakpan dili gayud mao ang tinuod nga nagdagit sa bata nga si Ellah Joy. Kinahanglang mapresentar sa kapolisan ang mga circumstantial evidence nga mosuporta sa pamahayag sa tulo ka bata nga mitistigos. Pananglit kadtong sakyanan nga giingong gisakyan sa mga mikuha ni Ellah Joy, angay kadto nga makuha og mapresentar sa kapolisan sa mga saksi.
Kun ila na nga makuha, sutaon nila kun kinsa ang nag-drive niini atul sa adlaw ug oras nga gidagit ang bata. Kun pananglit iya kini sa usa ka rent-a-car company, sutaon kun kinsa ang migamit.
Pananglit ang tagdumala sa rent-a-car moingon nga ang migamit niini mao ang Norwegian national, aw kana maisip na nga circumstantial evidence nga makatabang pagpalig-on sa kaso.
Kun testigos ra gud sa mga bata ang saligan, pastilan, kadali ra g’yud kini tuison. Sa mga inantigo nga paagi sa uban, bayaran ra ang mga bata aron usbon ang ilang pamahayag, wala nay kaso.
* * *
Tan-awa, gisuportahan ni Regional Trial Court (RTC) Executive Judge Meinrado Paredes ang gibatbat nako nga may pagka illegal ang pagdakop sa Norwegian national ug sa iyang girlfriend. Ako kini nga gituki dinhi sa atong lindog pipila ka adlaw ang milabay, ingon man sa akong lindog sa The Freeman.
Ang Warrantless Arrest gud nga gilatid sa Article 113, Section 5 sa Rules on Criminal Procedures klaro kaayo.
Gipasabut sa lagda nga ang usa ka tawo mahimong dakpon bisan og walay warrant of arrest kun kini masakpan sa akto nga talihimo pa og krimen, sa akto nga naghimo sa krimen ug human sa paghimo niya sa salaud.
Ang laing basihanan mao nga mahimong dakpon ang usa ka tawo nga wala na kinahanglana ang warrant kun human g’yud sa krimen ang kapolisan duna dayo’y personal knowledge sa hitabo nga nagtumbok sa maong dakponon nga siya ang naghimo sa krimen.
Ang ikatulo nga basihanan mao nga ang dakponon usa ka pugante gikan sa mga prisohan sa kagamhanan.
Ang ikaduhang lagda sa pagpatuman og Warrantless Arrest nagpasabot nga kun ang kapolisan nga miabut sa “crime scene” makakuha dayon og inpormasyon gikan sa mga eyewitnesses kun kinsa ang naghimo sa krimen, mahimo kini nga molusad dayon og “hot pursuit operation” aron dakpon ang suspetsado. Apan sa kaso nga pagdakop sa Norwegian national ug sa iyang Filipina girlfriend gihimo kini pipila na ka adlaw gikan sa pagkahitabo sa krimen.
Ang kapolisan wala g’yud dayon mahibawo sa “identity” sa mga nagpatay ni Ellah Joy dihang miresponde sila sa crime scene. Dili na man gud maisip nga usa ka continuing crime ang kaso nga naglambigit ni Ellah Joy.
Lahi sa mga kaso nga kidnapping with ransom nga ang kapolisan mahimong makadakop sa mga akusado nga wala na kinahanglana ang Warrant of Arrest bisan og taud-taud na nga nahitabo basta wala pa makit-i ang gidagit.