EDITORYAL - Ang ganting salapi

Dako kaayo og ikatabang ang ganting salapi nga itanyag ngadto sa publiko aron pagdani sa kadaghanan pagbutyag ngadto sa mga otoridad sa nahimutangan sa gipangitang kriminal.

Pero sa bahin sa usa ka langyaw ug sa Pilipinang pangasaw-onon niini kinsa gipugngan sa mga otoridad sa tugpahanan sa Mactan kay miamgid sa cartographic sketch sa kapolisan, way laing makadawat sa maong ganti kundi ang mga otoridad nga mipugong sa duha.

So dinhi nakita sa kadaghanan ang ka –epektibo sa pagtanyag og ganti kun ang tuyo mao lang pagkaplag sa mga tawong gipangita.

Tinuod kana, nga bisan ang ginikanan, mga igsuon, ug kaparyentihan may katungod nga mopahimulos sa maong ganti kay di angayang ililong ninyo sa mga otoridad ang inyong minahal sa kinabuhi nga may dakong tulubagon sa hustisya.

Kay ang pagbuhat sa ingon, naghatag lang mo og higayon nga makahimo pa og dakong salaod ugma damlag ang inyong giprotektahan nga labing makadaot sa iyang pagkatawo ug ingon man kaninyong iyang mga kaliwat.

Busa pinaagi sa itanyag nga ganti daghan kaayong maningkamot nga makauna sa pagpahibawo sa mga otoridad bahin sa mga wanted nga kriminal aron kini madakpan ug sa samang higayon makadawat sa ganti ang informer.

Karon ang bahin sa manag-uyab nga anaa na sa mga kamot sa mga otoridad, mao na gyud kaha kini sila ang tinuod nga kriminal kinsa midagit ug mipatay sa 6 anyos nga bata.

Hinuon ang mga otoridad sama sa taga Bureau of Immigration ug ang kapolisan positibo sila nga wala sila masayop pagsikop sa mga subject, kini tungod sa kalig-ong mibarog ug mipamatuod sa mga saksi nga nagtumbok sa langyaw ug sa Pilipinang uyab niini nga maoy mga suspetsadong midagit ug mipatay sa biktima.

Apan kun mapamatud-an usab nga misipyat ang maong mga saksi pag-ila sa mga suspetsado, moangkon kaha ang kapolisan nga misipyat usab sila? Unsa may lig-on, ang mga ebidensya sa mga dapit nga gisuroyan sa mga suspetsado sama sa mga resibo ug uban pa niadtong mga takna nga gidagit ug gipatay ang biktima, o ang mga pamahayag sa mga saksi? Di ba?