Dihang naghilak si kanhi COA auditor Heidi Mendoza nga nihangyo sa mga senador nga di na lang siya patambungon sa mosunod nga mga hugna sa ilang imbestigasyon sa nabutyag nga lapad nga pangurakot sa Armadong Kusog, nakabatyag ko sa kabug-at sa tahas nga iyang gipas-an. Tungod sa pagpili pagtug-an unsay gidangatan sa iyang pakisusi sa mga transaksiyon ni Maj. Gen. Carlos Garcia, gihagit ni Mendoza ang bangis nga sumbalik ug panimawos sa gamhanang mga opisyal ug institusyon nga iyang naligsan.
Way makabasol ni Mendoza kun motak-om na lang. Kay samtang nindot paminawon ang mga pasidungog sa iyang kaisog ug kaligdong gikan sa nagkalainlaing kahugpongan, di makadasig ang pait nga gidangatan sa mga nag-una niya.
* * *
Usa nila si Jun Lozada, ang star witness sa multi-milyones pesos nga NBN-ZTE scandal. Kansang talagsaong kasayuran sa transaksiyon nakapatay-og sa nasud ug sa katawhan kay nilambigit sa labing gamhanang mga opisyal sa gobyerno, apil nang kanhi presidente Gloria Arroyo, kanhi first gentleman Mike Arroyo ug kanhi Comelec chairman Benjamin Abalos.
Apan nakatiwas sa iyang termino si Arroyo ug wa masiloting iyang bana ug si Abalos. Samtang si Lozada nawad-an og trabaho, gidagit, gipakauwawang may kabit, nabaldang pag-eskuyla sa iyang mga anak, nasakit ang iyang asawa, gipanghingawat sa iyang mga transaksiyon ug, labaw sa tanan, gikalimtan nang iyang gipalili natong kinatibuk-ang kinawatay sa gobyerno.
* * *
Usa sa gibutyag ni Lozada mao nga ang Government Procurement Act ug ubang mga balaod napakyas pagbadlong sa anomalusong mga transaksiyon sa nagkalainlaing mga buhatan sa gobyerno. Nga pulos gipasikad sa gidak-on sa komisyon (“tongpats” ug “bukol”) nga makuha sa mga hawod sa pamunoan, inay sa panginahanglan sa katawhan.
Karong wa nay nagtagad pagkuha sa dugang testimoniya ni Lozada, wa nay sakop sa duha ka bay balaoranan nga nidason pagtuki unsaon “pag-moderate” ang “greed” sa mga opisyal sa gobyerno. Wa nay naghago pag-umol og mga balaodnon unsaon pagpugong nga masubli NBN-ZTE ug ubang mga eskandalo.
* * *
Nakasaksi ko unsa kalisod ang kahimtang ni Lozada dihang amo siyang gidapit sa KBP Cebu Media Forum sa iyang pagduaw sa Sugbo human sa iyang expose. Nahikay na namong venue ug ubang panginahanglan pila ka adlaw sa wa pa ang forum. Apan sa adlaw sa pag-abot ni Lozada namalibad ang among mga gikasabot human pasidan-i sa dagkong mga opisyal sa gobyerno.
Sa atong kaugalingong nataran, nia si Cris Saavedra. Kansang mga dokumento maoy nakabutyag ug nahimong sukaranan pagpasaka og mga kaso sa mga anomaliya sa mga proyekto sa MCIAA ug sa niaging Asean Summit. Apan bisan sa talagsaong tampo ni Saavedra, nga wa mahimo sa mga sakop sa media ug ubang nagpakabanang sektor sa Sugbo, padayon siyang gipakauwawan nga buang-buang ug gipasanginlang namolitika.
* * *
E-mail: leo_lastimosa@abs-cbn.com