EDITORYAL - Militar angay maniid

Angay bayang higpitan sa kasundalohan ang pagpaniid di lang sa ilang kontra nga mga rebelding komunista kundi bisan ang kaugalingon nilang mga sundawo.

Kini tungod kay bisan kun naanad na sila niining tradisyon ug walay bugto nga binuang sa ilang mga kadagkoan bahin sa panalapi, apan kun magpunay nalang og ingon niini ang di maayong pagwaldas sa buhis sa katawhan, mapul-an baya ang ubang mga tawo.

Nasayud ang daghang mga Pilipino nga matag karon ug unya adunay madiskobrehang anomaliya bahin sa panalapi nga mugna sa utok sa mga dagkong opisyal sa military.

Apan mahupay ang hunahuna sa katawhan kun makadungog nga gihusay kini ug gitaral sa hukmanan ang mga nagmugna sa maong mga anomaliya.

Unya magtuo ang kadaghanan nga inigkasulbad sa maong problema wa nay motumaw pang laing binuang, uy inigka-mingaw-mingaw mokalit naman lang usab pagsulbong ang mga balita nga ang minilyon ka pesos nga buhis sa katawhan gi-um-om ra sa pipila ka tiyan sa mga dagkong opisyal sa kasundalohan, Di makapakurat kaayo ?

Daghan kaayong mga opisina sa gobyerno nga nag-abang lang og mga opisina kay walay kuwarta ang gobyerno nga ikapalit og yuta. Walay mga kahimanang arang-arang kay walay kuwarta, may mga kawani nga nagpaabot nga makabaton og arang –arang nga suweldo, apan walay kuwarta, pulos lang daginot kay way kuwarta. Way kuwarta…way kuwarta..ug way kuwarta. Gasige lang og way kuwarta.

Sa laktod apiki pirme ang gobyerno sa panalapi kun hisgotan ang gagmay apan mahinungdanon kaayong gastohanan sa mga serbisyo niini ngadto sa katawhan.

Apan nganong sa ubang opisyal niini, sama sa militar, GSIS, SSS, unsa pa na dihang mga opisina nga tag minilyon ka pesos usab ang suhol sa ilang mga opisyal sa matag buwan , sayon ra kaayong ipagawas ang kuwarta alang sa ilang kaugalingong tiyan?

Ginganlan nila kini og tradisyonal nga sistema sa panuweldo sa mga kadagkoan sa kagamhanan sa nasud. Sa atong kahimtang karon di ba mahimong butangan og delikadesa ang panuweldo sa ubang mga opisyal sa gobyerno. Kanang suhol nga mobagay-bagay og dyutay sa atong kabus nga kahimtang? Di   ba?