EDITORYAL - Ang illegal recruiter

Ang pagpabilin hangtod karon sa mga illegal recruiter nagpasabot nga wala sila mahadlok nga kapahamtangan og bug-at nga silot.

Nahisama ra sa illegal drugs ug uban pang illegal nga nagpadayon sa ilang paglihok dinhi sa nasud.

Daghan usab ang malingla sa mga illegal nga recruiter tungod sa makapadani nilang mga pulong.

Tungod kay gipangandoy sa mga Pilipino mao nga tua sa gawas sa nasud ang daghang kuwarta, mapugos sila sa pagtuo bisan pa kun way klaro ang mga tawong modani kanila aron makatrabaho didto sa gawas.

Dugay na baya kaayo ning kasoha, ug daghan nang mga illegal recruiter nga namatay gumikan kay gipatay sa ilang nailad.

Daghan mang nabiktima sa illegal recruiter nga nalubong sa utang, nabaligya ang mga kabtangan, naprenda ang balay ug uban pang kadaot sa pagpuyo kay lagi nadani sa maayong pasalig sa illegal nga recruiter.

Luyo sa mga pahimangno sa gobyerno pinaagi sa taga media nga nagpasidaan nga di angay motuo sa mga tawong mang-recruit og trabahante ngadto sa gawas kun wala kini lisensya sa POEA, ang uban di maminaw niini.

Di motuo sa mga pasidaan sa gobyerno kay ang naa sa ilang hunahuna mao nga molayas gyud sila sa nasud aron maluwas gikan sa kakabus.

Busa may mga babaye nga gumikan sa pagkalingla sa mga pasalig sa mga illegal recruiter nahimo na karong makaluluoy didto sa gawas.

Imbis naglantaw nga makuwartahan sila ug makabayad sa ilang utang dinhi sa nasud, nahipunta hinuon sa prisohan pag-abot didto sa gawas tungod kay way klarong mga papeles.

Kun makatrabaho man, wa usay suweldo. Kun makakita man og amo pahimuslan usab ang pagkababaye, hangtod nga kun hisakpan sa asawa, di na pakan-on, di suholan, kulatahon kanunay, bun-ogon ug tanang panaogdaog iyang matagamtaman tungod kay nakagawas sa nasud nga way klarong tumong kay nailad sa illegal nga recruiter.

Mao lagi panultihon nga way mangingilad kun way magpailad, busa milahutay ang mga illegal nga recruiter kay naa may magpa-recruit kanila. Di ba?