Paganismo sa pagtuo

Makakugang ang unod sa wali ni Msgr. Boy Alesna sa pagbukas sa Sinulog sa miaging Biyernes. Gipahimug-atan sa pari ang sayop nga debosyon alang kang Sr. Sto. Niño sama sa pagsayaw sa imahen nga nawagtangan na sa benerasyon o sinsirong pagha’d sa pag-ampo ug ang pagbutang lang sa imahe bisan asa labi na kung kapuyon na ang mga mananayaw sa taas nga rota sa Sinulog. Gawas niini, gibutyag ‘sab sa wali ni Alesna ang pagtratar sa katawhan sa imahe nga tawo sama sa pag-ilis og sinina ug mismong pakighinabi sa imahe ihangad sa langit ang mga katuyoan sa pasalamat ug pangindahay.

Panahon na aron tultolan sa kadagkuan sa simbahan ang mga deboto sa tukma nga paagi sa pag-ampo ug pagrespeto sa giisip nga labing milagrosong batang Hesus. Ang gibutyag ni Alesna sa iyang wali mao ang tataw nga pag-angkon nga luyo sa init nga debosyon sa katawhan sa batang Hesus, adunay sayop ug adunay dili tukma nga gihimo ang katawhan sa ilang pagtuo. Ang pagsayaw sa imahe nga daw kutob nalang sa rebolto ang pagtuo ang tataw nga timailhan sa pagka-paganismo sa katawhan. Ang maong matang lakang o pag-ampo nahitabo kaniadtong wa’ pay klaro ginoo ang mga tawo nga ilang gihatagan og pagtamod ang adlaw, buwan, mga tanom, yuta bisan unsang butang sa ilang palibot.

Apan karon nga klaro na kinsa ang atong manunubos, kinsa ang atong Ginoo ug kinsa ang nagluwas nato gikan sa atong mga kasaypanan ug kung kang kinsa ang nagsaad nga mosapnay nato sa panahon sa atong pagtaliwan niining kalibutana. Ang nahitabo sa sagad sa mga deboto mao nalang gyud ang pagtutok sa imahe ug wa’ na molapos sa mas tukma ug sentro sa debosyon nga mas lawom pa sa gihuptan nga rebolto. Kung magsige ang maong matang pag-ampo sa mga tawo, nga igo na nila ang pagsayaw sa ilang gihuptan nga imahe, nga igo nang ilang mapalitan og bag-ong sinina ang rebolto, nga igo na nga ilang dad-on sa matag prosesyon ang hulagway sa batang Hesus, sayon ra kaayo sa pag-ingon nga pakyas ang pagtuo ug pakyas ang simbahan sa pagpahinumdum sa katawhan sa mas lawom nga pagsabot sa pag-ampo.

Ingon niini ‘sab ang nahitabo sa mga deboto sa Black Nazarene sa kaulohan. Hangtud karon, di’ nako mahibaw-an ug di’ masu’d sa akong huna-huna ang ka delikado sa gihimo sa mga deboto aron lang makahupot sa pisi ug makapahid sa panyo ug tualya nga ilang gida’. Ang di’ nako masabtan nganong kinahanglan gyud nga modutdot pagmaayo, mosugal sa kinabuhi aron lang gyud makatuman sa ilang giingong mga saad alang sa ilang patron. Ang di’ nako masabtan nganong kinahanglan nga may kinabuhi nga makalas ug may kapin siete sientos ka mga tawo nga samaran sa nga’n sa debosyon ug pagtuo?

Apan di’ nalang sa dagkong piyesta sa nasud tataw ang giingong nipis nga kalainan sa debosyon ug paganismo. Bisan sa gagmay nga mga piyesta sa barangay nauso ang pag-adurno og mga buwak sa karo sa rebolto sa ilang mga patron. Apan wa’ pa gani makaabot sa ganghaan sa simbahan ang karo, naupaw na ang mga buwak nga gipamutang tungod kay gilabni sa mga tawo nga nagtuo nga maka-ayo sa sakit, swerte sa sugal ug maghatag og maayong pagpuyo ang maong mga buwak. Bakikaw paminawon nga imong gihalad ang maong mga buwak unya sa pagkahuman sa prosesyon kuhaon pagbalik. Karon nga nidagsa ang libuan ka mga deboto alang sa batang Hesus dinhi sa Sugbo, di’ ‘ta makalimot nga labing mahinungdanon mao gihapon ang kamatinud-anon sa atong pagtuo ug dili ang lakang sa usa ka paganismo.

* * *

Email: [email protected] or [email protected]