Pista Senyor

Ang mga bag-ong tubo (new generation) nga Sugbuanon, kon kadaghanan kanila, sayop sa ilang pagtuo nga ang tinuig nga kasaulogan alang kang Senyor Sto. Niño mao ang Sinulog festival kun mardi gras.

* * *

Ang prinsipalmente nga atong gisaulog mao ang Pista Senyor kon Piyesta ni Senyor Sto. Niño. Dili ang Sinulog.

* * *

Kining Sinulog festival nga namugna pipila pa lamang ka tuig kabahin ra sa kinatibuk-an kasaulogan nga mao ang Pista Senyor. Kining pistaha "natawo" panahon pa ni Raha Humabon.

* * *

Sa wa pa mitumaw kining Sinulog, libuan ka mga debotos ni Senyor Sto. Niño gikan sa nagkadaiyang hilit sa nasud moanhi sa Sugbo alang sa Pista Senyor. Ug aron moyukbo Kaniya.

* * *

Oo, moyukbo sila atubangan sa Iyang milagrosong imahen diha sa simbahan ni San Agustin (ngalan niadto sa Basilica del Sto. Niño) dili aron magsayaw-sayaw sa kadanan.

* * *

Karong henerasyona pipila na lamang ka mga lumad nga Sugbuanon ang moanha sa Basilica aron mohad og buwak, modagkot og kandila, o mag-sinug alang sa Senyor.

* * *

Hinaut unta nga ang bag-ong tubo nga mga Sugbuanon masayud nga ang atong gisaulog ning buwana dili ang Sinulog kundili ang Pista Senyor diin ang Sinulog usa ra ka tipik niini.

* * *

Usa ka malipayon ug sagradong Pista Senyor kanatong tanan. PIT SENYOR!