EDITORYAL - Gwen ug Mike nag-uli na?

Ang gipakitang panagsuod karon ni Gobernador Gwen Garcia ug Mayor Michael Rama usa ka kaugmarang angay ikahinangop sa kadaghanan sanglit mao kini ang labing maayong timailhan nga mibanagbanag na ang panag-uli sa maayong kabubut-on sa mga opisyal sa lalawigan ug sa dakbayan sa Sugbo.

Sa maong kalamboan, kahiusahan na sa duha ka lig-on ug dugokang panggobyerno sa Sugbo ang mga maayong kalamboan alang sa kaayohan sa mga molupyo, ilabi na niadtong apektado sa 93-1.

Sa bahin sa kagamhanan sa lalawigan ikapadayon na niini ang mga proyekto nga iya sa Kapitolyo sama sa Ciudad nga ania itarok sa dakbayan sa Sugbo nga makapabulahan sa   kagamhanan ning siyudad ug sa Kapitolyo.

Kini tungod kay matag kitaon sa Kapitolyo gikan sa maong proyekto , siyempre may bahin usab ang kagamhanan sa dakbayan sa Sugbo pinaagi sa buhis nga angay ibayad niini ngadto sa panudlanan ning dakbayan.

Kining tanan mahimo ra kaayo tungod kay mga hamtong na og pangisip si Gobernador Gwen ug Mayor Mike , ug tinuod nga politiko nga kaantigo maminaw sa pulso sa katilingban.

Kay angay natong sabton nga ang panagbingkil, sa mga tinuboy sa katawhan nga mga opisyal sa kagamhanan dili kinaiya sa hamtong na og pangisip kundi sa mga bata nga kuwang pa og hustong kabuot.

Apan mas maayo ang mga bata kay dali rang magkauli kay may igo silang kinaiya sa pagkabata nga dali rang pasabton sa mga hamtong.

Samtang ang mga hamtong na nga pangisip ug mga lider pa gyud  sa sosiyedad, dako kaayo og kalainan sa mga hunahuna nga binata, apan kun ugaling aduna may mga opisyal nga ingon sa maong kinaiya, aw kamo nay mosabot kun unsang matang nang mga opisyala sa gobyerno.

Mao bitaw nga usahay makaingon ta nga kun ang maong mga lider anaa pa lang tingale ubos sa usa ka relihiyosong pundok kansang mga lider gamhanan kaayo ug puno sa kridibilidad nga angay tahuron ug respitohan sa iyang mga sakop dili mahitabo nga ang nagkabingkil nga mga miyembro ilabi na kun sila tinamod sa katilingban, dili magkasinabot dayon.

Busa kun nakamatngon na sila karon si Gobernador Gwen ug Mayor Mike nga ingon diay niini kamahinungdanon ang ilang katungdanan ngadto sa katawhan, angay silang magpasalamat nga hamtong na sila sa pangisip nga maoy maayong kalidad sa tinuod nga lider ug magpasalamat sila nga may mga kritiko nga nagpunay og saway sa ilang binatang kinaiya niadtong diha pa sila sa pagdinumtanay. Di ba?