Usa sa mga suki nga tigbasa sa Banat News misumbong bahin sa nasinatian niya sa usa ka tindahan diha sa barangay Tabunok, dakbayan sa Talisay niadtong Sabado , Dec. 25, 2010 sa udto nga matud pa gikalalis niya ang usa ka kahera tungod kay gi-away siya kay wa siya modayon og palit sa tulo ka helmet.
Imbis tulo unta, apan dihang napanso na sa kahera , nausab ang iyang hunahuna ug gihangyo nalang niya sa minatarong nga paghangyo ang kahera nga usa nalang ang iyang paliton.
Apan mihiwasa kuno sa kasuko ang kahera kay dili kuno mahimong di niya bayran ang tulo ka helmet kay napanso na sa iyang cash register machine.
Unya kay nakahukom naman siya nga gumikan sa kangil-ad sa kinaiya nga gipakita sa maong kahera kaniya, imbis mopalit unta siya og usa ka helmet, nakadesider siya nga di nalang gyud gumikan sa kamaot og kinaiya sa kahera.
Unya tungod kay di na siya modayon og palit sa helmet gikuptan kuno siya sa security guard sa maong tindahan kay pugson gyud siya pagpabayad sa helmet nga wa niya dayona og palit.
Taym pa, unsa man diay ang pamaagi ug balaod sa mga tindahan, pugson diay ninyo ang customer nga way gustong mopalit sa inyong baligya, naa bay balaod niana?
Ang customer nga mangompra og mga baligya sa tindahan , unya inigkuwenta na sa tanan niyang bayranan, kuwang ang iyang kuwarta, unsa man inyo gyud diay nga pabayran kaniya ang iyang kinompra bisan wala na siyay kuwarta?
Ang customer nga misumbong dinhi sa Banat News sa iyang nasinatian, may kuwarta ug andam gyud unta nga mopalit sa usa sa tulo ka helmet nga iyang naibgan, apan tungod sa ka-mananap og kinaiya sa kahera nga bisan wala siyay gusto sa tulo kay usa nalang gyud ang iyang paliton, napugos siya sa pagsalikway sa tulo ug wala na siya mopalit bisan usa niini.
Unya mamugos diay mo sa tawong wala nay gana mopalit sa inyong baligya gumikan sa hinayop nga kinaiya sa inyong mga tawo.
Gigunitan pa kuno siya sa sikyu kay pabayron gyud siya sa helmet, nga wala diha sa iyang kamot kundi didto sa kahera nga salbahis.
Mas maayo tingale sa tag-iya sa maong tindahan nga papahawaon na nimo ang imong mga empleyado nga mananapon og kinaiya kay mao nay makapaislag sa imong mga customer ug dili na ganahan mamalit sa inyong baligya. Ang ngan kuno sa maong tindahan nagsugod og capital U.Di ba?