Leksiyon alang sa gobyerno ang nahitabo sa usa ka marine watch volunteer sa lungsod sa Cordova nga si Rudy Sultan.
Ang kampanya batok sa illegal nga pagpangisda dili mahimo kun mga volunteer lang maoy saligan tungod kay gawas nga kuwang sila sa training wa sab sila’y armas nga ikapanalipod sa ilang kaugalingon. Ang labing pait nga kamatuoran mao nga wa intawon silay sweldo o bisan insurance nalang alang sa ilang kaugalingon aron simbako unsay ilang dangatan sa paghimo sa ilang trabaho dunay madawat ang ilang pamilya.
Pananglitan ang nahitabo ni Sultan didto sa Cordova. Siya usa ka volunteer nga misugal sa iyang kinabuhi sa pilegro bisan kun way suhol nga gidawat. Bayani man siya alang sa mga mata sa publiko apan sakit ang kamatuoran nga way klarong benipisyo nga madawat ang iyang pamilya.
Si Sultan gituohan nga gitambog sa duha ka mga illegal nga mananagat nga ilang nadakpan didto sa Cordova. Si Sultan nag-iskort nila ni Dongcoy Yongco ug Luis Fernandez paingon sa baybayon human sa ilang pagkasikop.
Apan si Sultan nga nag-inusara ug wala pa gyu’y armas tungod kay ang iyang kauban nga pulis padayon nga migukod sa mga kauban sa duha nga misibat yano rang gitambog sa mga suspetsado. Patay na dihang nakit-an si Sultan.
Ang nahitabo ni Sultan insulto sa kampanya nga gideklarar sa Kapitolyo batok sa illegal nga pagpangisda. Pipila ka adlaw sa wala pa mahitabo ang gidangatan ni Sultan, si Gobernador Gwendolyn Garcia mideklarar og all out war batok sa illegal fishing dinhi sa lalawigan.
Apan samtang dunay deklarasyon si Garcia iyang gitugyan ang kampanya sa matag lungsod ug component city. Dili igo ang kahimanan sa lungsod pagsakbang sa mas gamhanan nga mga gamit sa illegal nga mga mananagat.
Sa sakyanan lang daan, dili gyud intawon ka apas ang mga ordinaryong pumpboat sa lokal nga mga bantay dagat sa nagkadaiyang kalungsoran kun itandi sa mas kusgan ug moderno nga mga sakyanan nga gigamit sa mga illegal nga mangingisda.
Gawas nga kusgan ang mga sakyanan sa mga illegal nga mananagat, gamhanan pa gyud ni og mga armas. Mosukol ni og pinusilay ang mga illegal nga mananagat kun maapiki.
Unya unsa may gamiton sa mga volunteer? Duna man tinuod silay kuyog nga polis sa pagpatrolya sa kadagatan apan pila ra man kabuok?
Mao nga kun seryoso gyud si Garcia sa iyang deklarasyon sa all-out war batok sa illegal fishing, mas maayong mohulma gyud siya og usa ka special task force dinhi sa Sugbo. Palitan og kumpleto nga mga gamit sama sa bangka ug mga armas.
Kinahanglan nga ipaubos sila og training aron mamahimong epektibo ang kampanya og dili kay magsalig lang sa mga volunteers.
* * *
fplanguido@yahoo.com (BANAT NEWS)