May ceasefire sab diay ang gobernador ug bise gobernador sa probinsiya, unya unsa man ang mayor ug kongresista sa dakbayan sa Sugbo, sige lang kombati? Way ceasefire?
Pastilan, ayaw mo palabi og pabadlong oy, unya puwerting moawhag sa mga sakop nga ..kinahanglang maghiusa gyud kay diha sa panaghiusa anaa ang puwersa.
Magpinasayloay kay Pasko, unya human sa Pasko padayon og pinahitay, pastilan baya.
Ambot kun itandi ni sila si Bise Gobernador Greg ug Gobernador Gwen sa military/police ug NPA, kinsa kahay moangkon kanilang duha nga mura sila og NPA o kaha AFP/PNP.
Tingale magdungan sila og pataas sa kamot nga ari sila sa sundawo o kaha polis sila di ba?
Pero kun maminaw ra ba ta sa duha ka side kun magkagubot-gubot sila luyo sa gipirmahan nilang pormal nga ceasefire agreement, mag-iyahay ra ba og tudtod batok sa usa ug usa.
Kun mangutana ka sa NPA kinsay nanguna sa kagubot, mopasangil dayon ngadto sa military o polis, ug kun ang military o kaha polis usab ang imong pangutan-on, NPA usab ang pasanginlan.
Ato ning nahisgutan tungod kay matag tuig may ceasefire man sila nga masayran sa katilingban kay ipasigwar man nila sa tibuok nasud nga tungod ug alang-alang sa Pasko, mamahuway una sila og pinusilay.
Sa bahin ni Gob Gwen ug Bise Gob Greg, unsa man ni nagpinirmahay ni sila og ceasefire agreement?
Kay kun wala, kini ra bang taga media kusog kaayo mokulitog og isyu, unya basin baya sa wala pay 3 ka hari o Enero 6, sumala kang Bise Gob Greg, naay usa kanila nga mosuway og arangkada batok sa usa aron mabugto ang maong ceasefire.
Ato ning timan-an mga higala, unsa man ni nagsugod na ba og epekto ang maong ceasefire?
Pero mura ma’g si Bise Gob Greg ray nagsulti niining ceasefire unya si Gob Gwen wa man.
Mas maayo tingale sa atong mga amigo sa buhat nga inyo usab nga sukiton si Gob Gwen kun uyon ba siya nianang ceasefire, ha.
Basin baya kun makaingon si Gob Gwen nga tinalawan ning kang Bise Gob Greg. Klaroha na ninyo oy. Mura ta og magkatawa ambot ba oy.