Nagubot na sab sa dakbayan sa Talisay sa miaging adlaw, ug husto ka sa imong tag-an nga ang hinungdan way lain kun dili ang pinangga na sab nga sinagop ni Mayor Socrates Fernandez.
Si Joavan Fernandez gipasanginlan na sab nga nanion ug namusil sa club house attendant sa Vista Grande Subdivision human wala dayon mahatagi sa gipangayo niini nga softdrinks.
Nunot sa reklamo dali nga mirespondi ang kapolisan sa Talisay apan sama sa naandan way Joavan nga ilang naabtan. Dali nga nakasibat ang barumbadong sinagop sa mayor.
Gibantayan sa kapolisan ang Balay Ampuanan ni Fernandez sa pagtuo nga atua motago si Joavan. Tungod kay mayor man lagi ang tag-iya niini naniguro ang kapolisan pagkuha og search warrant gikan sa korte aron ilang maronda ang kapilya nga nagsilbi na nga hideout ni Joavan ug sa iyang mga barkada.
Tibuok gabii nga nagbantay ang kapolisan niadtong Miyerkules hangtud hingpit nilang naronda ang kapilya kagahapon sa udto. Pinasikad sa search warrant nga giluwatan ni RTC Judge Soliver Peras gisuhid sa kapolisan ang Balay Ampuanan aron pangitaon ang armas nga gigamit ni Joavan.
Apan pakyas ang kapolisan, way armas nga nakit-an ang mga awtoridad, hinuon ang presensiya sa mga drug paraphernalia sulod niini nagkompirmar sa dugay nang taho nga ang gibalaang dapit sa iyang amahan gigamit na isip suyopanan og drugas.
Wala na sab si Joavan didto, ang misugat sa kapolisan mao nalang ang duha ka mga maanyag nga mga babaye ug ang nailang suod nga bata-bata ni Joavan nga si Benedict Gabasa.
Matud pa sa report nga gahapon pa milayas si Joavan paingon sa Barangay Candulawan. Human sa labing awahing insidente nga gikalambigitan ni Joavan, ang mga sakop sa Vista Grande Homeowners Association nagtinguha na nga hingpit mapalayas gikan sa ilang dapit ang sinagop sa mayor.
Matud nila nga dugay na silang nagpuyo sa kahadlok ug kahasol sa kasamok nga mugna ni Joavan diha sa malinawon unta nilang kumunidad. Sumala pa nila nga dili makiangayon alang nila nga migasto og dakong kantidad aron mopuyo sa usa ka subdivision apan tungod lang sa barumbado nga anak og mayor matugaw ang kamalinawon sa ilang pagpuyo.
Dugay na nilang gipaabot ang ilang reklamo ngadto sa mayor apan matud pa nga nagpunay lang og pasalig si Soc nga iyang ipaimbistigar. Mayor Soc pagbaton sab og kaikog sa mga molupyo diha sa subdivision nga nahasol sa imong kakonsintidor nga pagkaamahan.
Hiposa na ang imong anak sulod sa rehabilitation center aron makabaton og kalinaw ang mga molupyo diha sa Vista Grande ug sa dakbayan sa Talisay sa kinatibuk-an. Bisan kana nalay pinaskuhan ang imong ihatag sa mga molupyo sa Talisay.
* * *