Gibaraw sa SC

Misagunto na usab ang administrasyong Aquino human ang Korte Suprema mibaraw sa legalidad sa Truth Commission. Matud sa Labaw’ng Hukmanan nga unconstitutional o illegal gayud ang katukoran sa Truth Commission.

Ang Truth Commission, nga pinangulohan ni kanhi Supreme Court chief justice Hilario Davide Jr., gimugna sa bag-ong administrayon aron kuno paglantaw sa mga kadudahang transaksiyon sa administrasyon ni kanhi presidente Gloria Macapagal Arroyo.

Ang maong komisyon naumol pinaagi sa unang executive order ni Presidente Aquino sa unang mga adlaw paglingkod niya sa Malacañang. Apan wala pa kini makabuwelo gumikan sa isyu sa legalidad niini.

Daghan ang mikuwestiyon niining maong komisyon tungod kay usa kuno kini ka paagi paggukod sa nakalabay’ng administrasyon. Ug midagan sila ngadto sa korte aron pagpugong niini.

Pipila ka bulan human sa katukoran niini, midesisypon ang Korte Suprema nga ilegal ang maong komisyon. Hinuon dili pa final ang maong desisyon. Mahimo pang moapelar ang administrasyon sa pamasin nga mausab pa ang desisyon sa Labaw’ng Hukmanan.

Hinuon expected na kuno sa tanan ang desisyon sa SC. Kini gumikan usab sa rason nga mayoridad sa mga hurado sa Korte Suprema pulos mga appointee sa kanhi presidente.

Hinuon, alang kanako, wala usab kini nagpasabot nga midapig ni Arroyo ang mayoridad sa mga hurado sa SC. Ila lamang gayud nga nakita, sa ilang pagtimbang-timbang, nga ilegal gayud ang katukoran sa maong komisyon. Ug dili usab kita makabuot sa maong desisyon. 

Hinuon usab dili nato maisalikway ang posibilidad nga ang maong desisyon sa Korte Suprema makita sa uban nga bayad sa pagkatudlo sa pipila ka hurado ni Arroyo sa SC.

Ug dili gayud mawala kanang maong posibilidad hangtud nga walay maayong eksplinasyon ang SC mahitungod sa desisyon niini pagbalewala sa legalidad sa Truth Commission.

Apan, kun buot nato nga huna-hunaon, premiro pa kini sa kasaysayan sa Pilipinas nga adunay komisyon nga gitukod aron lamang pagtan-aw sa kahiwian sa usa ka administrasyon.  

Lahi kini sa Presidential Commission on Good Government nga gitukod sa administrasyon ni kanhi presidente Cory Aquino. Tumong lamang sa PCGG mao ang pagkuha sa giingon mga ill-gotten wealth sa administrasyon ni Marcos.

Apan ang Truth Commission sa administrasyon ni P.Noy mao nay himuong molili kuno sa mga kahiwian sa nilabay’ng rehimen. Dili kini usa ka korte nga sandigan sa katawhan.

Kay nakita na man sa Labaw’ng Hukmanan nga sukwahi sa nalatid sa balaud ang katukoran sa Truth Commission, kinahanglan nga ato usab kini nga respetohan.  

Alang sa Korte Suprema, ang korte maoy angay molili sa unsa mang alegasyon sa corruption sa Arroyo administration ug dili ang Truth Commission. Dinhi misango ang administrasyon ni P.Noy.

* * *

Email: [email protected]