EDITORYAL - Nganong di man ipa-korte?

Kun tuyo sa Malacañang nga pasakaan og kaso ang mga malapason sa balaod sa administrasyon ni kanhi Presidente Gloria Macapagal Arroyo, aron kasilotan, di man tingale kinahanglan pa ang Truth Commission.

Ang Truth Commission kansang function ug objective mao lang ang pag-imbistigar sa mga malapason, wa man gihapoy ngipon aron mosilot sa malapason.

Kay sa pagkatinuod, ang korte ra man maoy makapahamtang og silot niadtong malapason busa mas maayo pang ideretso nalang pagkiha ngadto sa korte kadtong malapason kay sa ipaagi pa sa Turth Commssion.

Mao bitaw nga daghang nagduda nga gisurambaw ang paggama sa "vision" "mission" ug "objective" sa maong komisyon kay luyo sa kabatid ug kahanas na sa mga tawong modumala niini, gipaligas gyud og tuyo ang paghan-ay sa mga tumong niini aron dili motukma sa Konstitusyon.

Sa panahon ni kanhi presidente Marcos, kadtong mga nangiriw sa kuwarta sa gobyerno pinaagi sa mga proyekto nga gipatuman sa departamento sa obras publikas, gitaral man sa hukmanan ug gani ang uban nga namatud-ang sad-an nangamatay didto sa prisohan.

Wa man to magtukod si Marcos og Truth Commission, tungod kay   ang paghimo sa ingon , wa may epikto kay mahulog ra mang igo ra sa pagpakauwaw niadtong maimbistigar nila ug mamatud-ang sad-an, apan dili sila makapahamtang og silot niini.

Busa mosamot ang kalangay sa proseso kay gikan sa Truth Commission isang-at na usab ngadto sa korte , imbistigahon na sab pag-usab, ug busa, mapupos nalang ang termino sa kasamtangang administrasyon wa gyu’y masilotang sad-an. 

Gitawag ra ba kini sa uban ug mibahag ang ikog, kay hadlok makigharong sa kontra , busa kun ingon niini ang taras karon sa administrasyon maglisod sila pagtuman sa ilang gipagarpar sa katawhan nga pasilotan gyud nila ang mga tawong nalambigit sa mga anomalusong transaksyon sa administrasyong Arroyo.

Pipila sa maong mga transaksyon   mao ang fertilizer scam, ZTE-NBN deal ug uban pa.

May plano pa usab ang Malacañang nga iapelar ang pagbasura sa Truth Commission, para unsa? di kaha kini paglangaylangay lang aron nga kun mapupos ang termino sa kasamtangang administrasyon ug wa sila’y kapasilotang makasasala sa administrasyong Arroyo may ika-alibi sila o kapasanginlang hinungdan? Di ba?