Magbabalaud nga wa motuo sa balaud

Nanganti ang nagtago-tago nga Senador, Ping Lacson nga dili siya mosumiter sa balaud ug kun magkinaunsa man makuha lang siya sa atong balaud ibabaw sa patay niyang lawas.

Kining maong panganti naghagit sa atong otoridad nga pangitaon gyod ang senador aron masugdan na sa pagtaral sa kasong iyang giatubang. Buot usab nga ipasabot sa senador ngadto sa mga otoridad nga wa siyay pagsalig sa balaud ug sa matang sa hustisya dinhi sa nasud.

Pagkasubo palandungon nga ang usa ka tigpanday og balaud ug gani hapit pa mahimong presidente sa nasud dili diay motuo sa atong balaud ug wa mosalig sa proseso sa atong hustisya.

Kun ang atong senador dili na motuo sa atong balaud ug proseso sa hustisya makapugos pa kaha ang atong gobyerno ngadto sa mga ordinaryong tawo sa pagsunod usab niini?

Ang senador taud-taud nang nagtago-tago pero nganong karon pa lang siya pangitaa sa kagamhanan ni Pangulong Noynoy, tungod ba kay friend sila? Ang sunod-sunod nga pagronda sa mga dapit nga gitoohang gitagoan sa senador tininood na gyod kaha? Di lang kaha ni drama sa kagamhanang Aquino aron dili magduda ang kabanay sa mga biktima ug katawhan sa naumol nang kasabotan tali sa pangulo ug sa nagtago-tago nga senador mahitungod sa iyang kaso?

Imposibling dili makit-an ug madakpan si Senador Ping Lacson kun tinud-on lang gyod siya sa pagpangita sa atong mga otoridad tungod kay advance na karon ang kahimanan nga gigamit sa atong militar ug kapolisan pagpangita niadtong mga nagtago sa balaud. Kun ang master sa art of hiding nga si Senador Gringo Honasan nadakpan sa atong militar ug kapolisan si Ping Lacson pa kaha nga tinudlo-an lang ni Honasan?