EDITORYAL - Ang bahad ni Sen. Lacson

Ang bahad ni Senador Panfilo Lacson nga pakamatyan niya ang kasong iyang giatubang kay sa motahan siyang malinawon sa hukmanan, usa ka bahad nga makapabalaka kaayo.

Nasayran na nga ania ra diay siya sa nasud magtago-tago human ibutyag kaniadto nga misirit siya ngadto sa gawas aron dili kahatdan sa arrest warrant nga giandam sa hukmanan nga isilbi kaniya.

Sayon kahang dakpon si Lacson, sama sa mga ordinaryong kriminal nga gipangita sa mga otoridad?

Kun ang kinaiya ni Lacson   sama pa lang kang anhing Dr. Jose Rizal kinsa giilang bayani sa nasud, dili tingale angayang mabalaka ang mga otoridad nga mosikop kaniya. 

Si Rizal sa atong nasayran sa kasaysayan, gipusil nga wala gayud mopakita og pagsukol, nagpakamatay siyang kontento sa iyang kamatayon ug walay reserbasyon sa mga desisyon sa hukmanan sa nasud.

Apan si Lacson kansang hiyas ug pagkatawo may kaisog ug agresibong mopatay aron lamang panalipdan ang iyang katungod, murag dili magpakamatay nga sama kang Rizal.

Ang mga opisyal sa kapolisan nga nasuhito kaayo kang Lacson niadtong siya pay hepe sa Cebu Metrodiscom , hangtod nga nahimo siyang hepe sa kapolisan sa tibuok nasud , nasayod na sa kadelikado sa prinsipyo niini kun masuko.

Sa hiyas ni Lacson, maanalisar sa kadaghanan nga dili kini mag paka matay nga dili usab mopatay.

Kun unsay abilidad nila ni Saddam Hussein ug uban pang banggiitang kriminal sa kalibotan, si Lacson usa sa dili nila hilabwan sa kaisog.

Nagtuo kita nga sa madugay ug sa madali, ang mga otoridad mosuway gayud sa pagdakop kang Lacson sa malinawong paagi.

Apan gumikan sa bahad niini nga mas maayo pang mamatay siya kay sa motahan sa walay hustisyang hukmanan, motuo kaha ta nga sama siya kang Rizal nga magpamakatay nga malipayon?

Dili kaha mobaha una ang daghang dugo sa mga mananakop una siya makuha nga patay na?

Unsa kaha ka-secure ang pinuy-anan karon ni Lacson nga sa mananakop nga mosuway og dakop kaniya makagawas lang gihapong buhi?