Condom, alang sa di gyud makapugong

Nagpiyesta sila si Rep. Edcel Lagman ug mga kauban sa RH Bill sa pronouncement sa Santo Papa nga mahimong gamiton ang condom pagbatok sa Aids. Hilabihan nilang lipaya kay alang nila, gi-endorse kono sa Santo Papa ang ilang RH Bill, sa ato pa, seguro nang mahimong balaud, dili na paminawon ang baruganan sa Simbahan dinhi sa atong nasud.

Di man ko maayong lake, apan sa ubos nakong pagsabut, specific kaayo ang tuyo sa Santo Papa, nga ang condom, dili aron pagsanta sa population, kundili, alang lamang niadtong mga lalaki nga dili matagbaw og usa lamang ka babaye.

Wa moingon ang Santo Papa nga aron masanta ang pagdaghan sa tawo, kinahanglan mogamit kitag condom. Naluoy lang tingali siya sa mga babaye nga nag-negosyo sa ilang lawas, ug sa mga lalake nga maglisud ug dili gustong mopugong sa ilang kahidlaw sa lawas.

Na, hala, sige! Patuyang, total naa man condom nga mo-protect kanato gikan sa sakit. Apan alang nako, the RH Bill is a different issue.

* * *

Sa mga traffic violation, usa ako sa nahibong ngano nga ang mo-decide kinsay sad-an, ang opisina man sa Citom, ang investigator nga naglingkod lang, ug dili kadtong actual ug on-the-spot nga nag-imbistigar sa aksidente? Ikaw, Dro, wa ka mahibong ini?

Usa ka higayon, sa Don Sergio Blvd, mibalhin kog lane, tungod kay ang akong gisundan nga sakyanan, mo-left turn man. Akong giseguro nga way approaching nga sakyanan sa likod. Apan, sa diha nga nasulod na ko sa right lane, kalit nga mihaguros ang usa ka PUJ ug nasaghiran kog gamay.

Naghuwat mig taga-Citom nga usually dugay’ng miabot. Nag-sketch-sketch ug naminaw konohay sa among mga explanation.

Sa buhatan sa Citom, miingon dayon ang nag-imbistigar namo, nga akoy sad-an kay mibalhin man kog lane. Wa siya maminaw sa akong giingon nga nakasud nako sa right lane, sa ato pa, lugar na ko, apan, kalit lang mobutho ang PUJ, nagdali kay dunay pasahero sa unahan.

Akong giingnan ang imbistigador nga layo pa kaayo ang PUJ sa akong pagbalhin sa lane. Apan, kaylagi ang mga PUJ driver mao may mga tag-iya sa dalan, nagpahaguros, ang PUJ, disregarding sa akong sakyanan nga diha na sa lugar sa right lane.

Apan, alang sa Citom, ako gyuy sad-an kaylagi, mibalhin man kog lane. Period.