Hapit tanang nikandidato nga napildi niadtong niaging presidential election wala na gayud makahinumdum sa ilang mga political leaders.
Of course, ang mga mananaug nga sila si Presidente Noynoy Aquino ug Bise presidente Jejomar Binay kanunay mobisita sa nagkalainlaing dapit sa nasud ginamit na ang salapi sa gobierno.
Apan ang wala nato paabuta mao ang pagbisita ni kanhi presidential candidate Manny Villar sa nagkalainlaing lalawigan aron pagpasalamat sa iyang mga supporters. Anaa usab siyay mga greetings sa radyo alang sa mga magsaulog sa ilang fiesta dinhi sa Sugbo ug sa ubang mga dapit.
Dalaygon kining hiyas sa usa ka politiko nga ingon niini!
* * *
Bisan unsa na lang ang mahunahunaan sa mga opisyal sa gobiyerno aron pagasto sa buhis sa katawhan.
Si Mayor Mike Rama buot mopalit og helicopter aron kuno iyang gamiton pag-aninaw sa mga dapit nga masunogan ug ubang mga dapit nga ma-igo sa kalamidad.
Si Bise Mayor Joy Augustus Young, nga gidasunan ni Kongresista Tomas Osmeña, buot mopalit sa ayroplano nga iya sa Department of Education.
Sa laing bahin, ang lalawigan sa Sugbo nipalit sa Balili property sa Naga, nga sumala pa sa Office of the Ombudsman naa ilawom sa tubig ang labing dakung parte niini.
Ang Department of Tourism buot mousab sa ilang logo ug slogan gikan sa “WOW Philippines” ngadto sa gisaway nga “Pilipinas kay Ganda” nga nigasto’g minilyon.
Hapit tanang mga local government units namalit og mga bag-o ug luho’ng mga sakyanan aron hamugaway kaayo ang ilang pagsakay.
Anaa pay daghang gidapatan ug gipamalit gamit ang buhis sa katawhan nga ang tumong ug tuyo mao lang gayud ang ilang kaugalingong interes.
Ang mga magbubuhis, nga maoy tag-iya niining maong salapi, nagkinahanglan sa mga batakang serbisyo.
Nganong dili man i-dapat ang maong salapi alang sa pagdugang og teheras ug tambal sa atong mga ospital, pagpalit og garbage trucks, pagdugang sa mga magtutudlo ug uban pa nga makahatag og maayong serbisyo sa komunidad?
Pagka-maayo gyud ninyo mowari-wari sa sapi nga dili inyo no?
* * *
Ni-resign si Tourism Undersecretary Vicente Romano tungod sa grabe’ng pagsaway sa ila unta’ng pag-usab sa logo ug slogan gikan sa “Wow Philippines”ngadto sa “Pilipinas kay ganda.” .
Samtang akong gikalipay ang talagsaon nga hiyas ni Romano nagpaabot ako nga himoon usab kini mismo ni Tourism Secretary Alberto Lim.
Nabunggo siya sa dihang nasayran nga nakagasto diay og kapin sa tres milyones pesos ang Department of Tourism (DOT) sukwahi sa iyang panghambug nga wala kunoy bisan usa ka diyut nga nagasto sa ilang pag-usab unta sa logo ug slogan.
Gawas sa pagpamakak manubag pa gayud siya sa gitawag og command responsibility isip pangulo sa DOT.
Mr. Lim gusto ka ba nga maglumlum diha?
* * *
Nganong wala pa man mahunong o bisan mominus lang unta kining pagpangurakot sa gobiyerno nga maoy gisaad ni Presidente Noynoy Aquino?
Wala pa man ako makabatyag nga ang iyang mga opisyal sama sa customs, nituman sa iyang kampanya batok korapsiyon.
Nagduda naman hinoon ko nga gitugutan lang usa ni Pres. Aquino ang iyang mga opisyal nga mamilyonaryo usa kini niya sumpo-a sa pagpangawat.
* * *
Masabot nako kun magkabingkil ang mga politiko labina kun magkaatbang kini sila og partido. Mao man kini ang politika dili lamang dinhi sa Pilipinas kun dili hapit sa tibook kalibutan.
Ang dili maayo’ng pamati-on kun binata ug personal na kaayo ang inatakihay. Dili kini maayong panig-ingnan ngadto sa mga batan-on nga maoy umaabot nga mga lideres sa nasud.
Ang pagpili og maayong lider dili pinaagi sa labing maayo’ng mosaway sa panagway sa usa ka tawo o sa kabayo nga binuhi sa usa ka politiko hinuno-a i-basi kini sa tinarong ug maayong pang-gobiyerno.
Apan unsaon nga dili man gayud pa-utang ang atong mga politiko. Sumala pa sa sinultihan nga gitu-is sa mga estambay: “Kun labayon ka’g pan balusi kini’g bato.”
Email: msr1144@yahoo.com