Adlaw sa mga Althonians

Gisaulog kagahapon ug karong adlawa ang anibersaryo sa pagkahimugso sa Alpha Theta Omega, ang usa sa labing dako ug prestihiyoso’ng fraternity dinhi sa Pilipinas.       

Liboan sa akong mga igsuong Althonians, ang tawag namong mga sakop sa maong organisasyon, sa upat ka suok sa kaliboan ang magtipok aron isaulog ang espesyal nga duha ka adlaw.

Dinhi sa Sugbo, ang mga Althonians tua nagtapok karon sa usa ka beach resort sa Lapu-Lapu City. Naandan na namong magtigum sa beach kun magsaulog sa among anibersaryo dinhi sa Sugbo. Kagahapon sa buntag, usa ka feeding program ang gipahigayon sa grupo didto sa Missionaries of the Poor sa Barangay Sawang Calero, Cebu City isip kabahin sa kasaulogan sa anibersaryo niini.

Usa lamang kini sa mga outreach mission nga gipahigayon sa maong grupo karong tuiga. Ug daghan pang mga community programs ang pasiugdahan sa Althonians sa sunod nga tuig.

Kadtong mga Althonians nga wala pa nasayod sa venue sa atong anibersaryo, mahimo kamong mo-coordinate kang Brod Irlito Piamonte, ang Supreme Grand Altho sa Cebu Unified Chapter.

Malipayong pagsaulog sa anibersaryo sa Alpha Theta Omega! Hinaut unta daghan pang mabulahan sa atong mga paningkamot alang sa usa ka maayong komunidad.  

* * *

Mibahag na ang ikog sa Vatican batok sa paggamit sa condom tungod sa grabe nga paglaganap sa AIDS tibuok kalibotan. Ug morag mikonsiderar na kini ug mipadangat nga dili babag sa moralidad ang paggamit sa condom.

Mismong si Pope Benedict XVI ang miingon sa iyang libro nga migula sa niaging semana nga maayo ang condom pangontra sa AIDS. Miani kini’g dakong kaguliyang sulod sa Simbahang Katoliko. Daghan ang miingon nga na-misinterpret lamang kuno ang Santo Papa. Ug nga dili niya buot ipadangat ngadto sa mga Katoliko nga gitugotan na sa simbahan ang paggamit sa condom.

Hinuon gitin-aw sa Vatican nga pabilin gayud ang baroganan sa simbahan nga imoral ang paggamit sa condom, pills ug uban pang paagi sa birth control, ilabina kun tuyo niini ang pagpugong sa binhi nga mahimugso.

Usa kana nga posisyon nga wala gayud mausab sa simbahan bisan pa man sa panawagan nga tugotan na ang mga Katoliko paggamit og birth control nunot sa nagkadakong populasyon sa kalibotan.

Apan niining paglugak sa Vatican sa isyu paggamit sa condom, adunay hayag nga nakit-an ang mga misuporta sa family planning dinhi sa Pilipinas. Hayag nga matud pa mao unya sinugdanan paglugak sa simbahan posisyon niini batok sa unsa mang birth control.

Hinuon dili gayud ikalimod sa simbahan nga dako kaayo og ikatabang ang condom sa kampanya sa Department of Health batok sa AIDS ug ubang pang mga sexually-transmitted disease, ug sa maayong pagplano sa pamilya aron pagkontrolar sa atong nagsakang populasyon. 

Apan ang maong kampanya wala makabuwelo gumikan sa grabe nga pagbabag sa simbahan. Ug tungod lagi sa grabe nga impluwensiya sa kaparian, midaug gayud ang simbahan batok sa kampanya sa kagamhanan alang sa maayong family planning aron pagkontrolar sa populasyon.

Apan karon misaka na ang kaso sa AIDS sa Pilipinas. Ug usa sa mga gibasol sa kagamhanan mao ang dili paggamit og condom sa mayoridad sa mga Pinoy, nga adunay multiple sex partners, sa ilang pagkighilawas.

Kini ang hinungdan sa pagdeklara sa DOH nga epidemic na ang sitwasyon sa AIDS dinhi sa Pilipinas.  

* * *

Email: [email protected]