Hunonga na ang abuso

Angay’ng moabag ang mga opisyal sa dakbayan sa Sugbo pagtudlo’g leksyon niining mga polis nga abusado g’yud kaayo, sama sa pag-drive og sakyanan nga walay lisensya ug walay rehistro.

Unya nalipay ko sa pasalig ni Konsehal Augustus Pe Jr. nga maoy tsirman sa Committee on Public Order and Safety sa Cebu City Council nga himoan niya kini og rekomendasyon.

Kadtong mga polis nga ania madistino dinhi sa dakbayan nga masakpang milapas sa mga tukmang lagda nga gilatid sa Republic Act 4136 ang Transportation and Traffic Code irekomendar niya nga silotan.

Unsay silot? Uyon si Konsehal Pe sa sugyot sa LTO Task Force Alpha nga tangtangan sa binuwan nga allowance sa City Hall kadtong maong mga polis nga madakpan.

Unya kay karong pila ka adlaw tag P2,000 na man ang binuwan nga allowance sa matag polis dinhi sa dakbayan aw daku-daku g’yud ang mawala kanila.

Nabantayan man gud sa mga sakop sa LTO nga abusado kaayo ang ubang polis. Ambut nagtoo tingali sila nga abi kay sila polis, labaw sila sa atong balaud.

Niadtong miaging Lunes sa gabii, usa ka polis nadakpan sa LTO nga nag-drive og motor didto sa Lahug nga walay crash helmet, walay side mirrors, nag-tsinilas, expire ang nagutay-gutay na niyang lisensya kaniadto pang 2008 ug walay rehistro sa iyang motor.

Kaniadtong miaging semana, duna say polis nga nadistino sa intelligence division nga ingon gihapon niini ang kalapasan.

Sa miaging gabii, may polis usab nga nadistino sa Guadalupe police station nga mao gihapon. Nag-drive og motor nga walay tail light, walay helmet, walay rehistro, walay side mirrors.

Dihang giparada siya atul sa operation sa LTO gitunol ra niya ang ID niya pagka polis, sama sa gibuhat niadtong polis nga nadakpan didto sa Lahug.

Ayaw intawon mo pag-abuso uy. Kaniadtong miaging Miyerkules sa hapon dunay polis nga nag-half uniform nag-drive og daku nga motor nga walay tail light.

Kay diha man ko sa luyo, akong gipangita ang plate numbers apan wala ko kakita. Gituparan nako ug nakit-an nako ang plate numbers nga diha ra gipapilit sa may tumbanan. Tarung ba gud na? Ang plate numbers sa sakyanan ibutang g’yud sa luyo nga dali ra nga makita kun motor, kun “four-wheel” vehicles duna usab sa atubangan. Ang tumong niini aron makita kun maka-aksidente ang sakyanan.

Natan-aw pa g’yud nako nga ang sticker sa gitago nga plate number kaniadto pang 2007.

Timan-i, basta LTO ra ba ang makadakup nga maglambigit na gani’g rehistro wala g’yud nay pasaylo. Dakua ra ba sa multa kon rehistro na ang expire ug ang pag-drive nga walay lisensya. Impound pa g’yud ang sakyanan.

* * *

Gipasalig usab ni Konsehal Pe nga kun ang polis nga madakpan sa LTO Task Force Alpha tua madistino sa ubang dapit gawas dinhi sa dakbayan, himoan nila og “trong recommendation” ngadto sa Police Regional Office-7 nga sila masilotan.

Unya kun mga sakop sa CITOM ang madakpan sa wala pagtuman sa mga lagda sa pagsul-ob og crash helmet, walay side mirrors ang sakyanan, walay lisensya nga mag-drive, walay rehistro o kaha expire na ang rehistro, taktakon sa serbisyo.

Na hala, timbang-timbanga ninyo kun unsay inyong angay’ng buhaton. Kun gusto mo nga maputol ang gidawat ninyo nga allowance sa City Hall o mataktak sa katungdanan, sigi padayon sa inyong kaabusado.