Daghan kaayong nakurat sa pintok nga gisulti ni Msgr. Achilles Dakay nga dili siya motuo nga gibungat sa baba ni Pope Benedict XVI sa Vatican City nga uyon kining gamiton ang condom batok sa AIDS.
Matud pa ni Msgr. Dakay nga nagtuo lang siya nga na-misquoted lang ang Santo Papa.
Kini tungod sa dakong pagtuo sa usa ka dakong opisyal sa simbahang Katoliko dinhi sa Sugbo nga dili masayop ang Santo Papa sa mga ipamulong niini.
Kay nagtuo ang tanan nga kun unsay baroganan sa mga kaparian bahin sa condom nga alang kanila, dautan gyung gamiton, ingon usab niini ang hunahuna ug baruganan sa Santo Papa nga maoy lider sa simbahang Katoliko.
Alang sa mga kaparian, ang paggamit og kontraseptibo lakip na niini ang condom gidili sa Ginoo, ug ambot asang sitasa sa Biblia mabasa kining maong pulong sa Ginoo.
Apan kun tinuod nga masuko ang Ginoo kun mogamit ka og condom batok sa AIDS, mosugot lang diay Siya nga mamatay ka sa AIDS?
Mao ra ba kini baruganan sa Santo Papa sa iyang libro nga “Light of the World” kinsa mipasabot nga isip nag-adbokasiya sa pro-life, iyang gidasig ang tanan nga mogamit gyud og condom aron ma-protihian ang kinabuhi batok sa AIDS.
Kun mosupak ang usa ka tawo niining awhag sa Santo Papa, nagpasabot lang nga unfair ang maong tawo.
Kay gusto ka ba lang nga ang binhi nga anaa sa lawas sa lalaki ug babaye nga wa pay klaro kun maayo bang lungsoranon imo gyung buhion, samtang may mga tawo nga nasinatian na nga nakahimo og maayo sa komunidad ug sa iyang isigkatawo ,apan patyonon sa AIDS, gusto lang diay kang mapuo sa dayon kining tawhana? Asa mang imong pagka-prolife niana?
Pero nganong bug-at mang tuohan si Pope Benedict XVI , tungod ba kay haguka siya og baruganan ? o ang taga media nga maoy nagpagawas sa maong balita maoy wala magtinarong sa pagpaminaw sa baruganan sa Santo Papa bahin sa condom ?kun si Mons Dakay maoy atong paminawon.
Ang pait niini kun mabasa gyud sa libro ni Pope Benedict XVI nga tinuod gyung pabor siyang ipagamit ang condom batok sa AIDS, unsa may ikasulti kaha ni Mons Dakay? Mao na.