Dili angay'ng kaloy-on

Kun nangangkon ang mga taxi drivers nga alkanse kaayo ang ilang kinitaan sa nanglabay’ng panahon, panglantaw nako mosamot pa ang ilang alkanse kun usbawan nila ang pletehan.

Natural, mominus g’yud ang mosakay og taxi kay ang ilang gisigyot sa Land Transportation Franchising and Regulatory Board (LTFRB) mao nga usbawan og P10 aron mahimo na nga P40 ang flagdown rate.

Napanglantawan nako nga mosamot g’yud kadaghan ang mga tawo nga mogamit na lang og motorsiklo kay mas minus man ang gasto niini kay sa mosakay ka og taxi, bisan na gani sa jeep.

Ako lang, mga walo na ka buwan nga migamit na lang og motor. Kataw-an na lang god ko sa akong mga kauban, sila si Johnrey Saavedra ug Fred Languido.

Maayo man sa motor kay ang P100 nga gasolina moabut man og upat ka adlaw, sa awto pastilan, takulahaw lang mahubaw ang imong gasolina unya dagku pa og budget kun maguba.

Kini maoy gihimo nako nga basihanan nga kun ang taxi magpausbaw sa pletehan, mosamot ang kanihit sa mga tawo nga mosakay og taxi. Aw hinoon kun mag-uwan mapugos na lang g’yud ang mga tawo pagsakay’g taxi.

Pareho nako nga kun mag-uwan, mapugos na lang pag-awto apan mas nindot g’yud alang nako ang mag-motor.

Tinuod grabe na g’yud ang pagmahal sa gasolina ug ubang fuel products uy. Ang gasolina tag P50 na ang litro ug tag P38 kapin ang krudo.

* * *

Buyno, ang mga jeepney drivers dili man tingali angay’ng mangayo’g usbaw. Abi ninyo’g ngano? Tag P6.50 ra ang gitugot nga pletehan sa LTFRB alang sa minimum nga gilay-on apan tagpila ang ilang gikolekta?

Tag P7 ang gikolekta sa mga drayber kay maglisud kuno sila og panukli sa 50 sentimos. Kun mohatag ka og P6.50 aw dawaton man nila, pero’g hatagan nimo’g tibuok P7 g’yud ang ilang ibanon.

Diha man gani ko’y drayber nga gidakop kay samtang giingnan ra nako siya sa hinay’ng pagkasulti nga mahimo siya nga madakop kay nangolekta og subra sa gitugot sa LTFRB, nasuko man hinoon.

Miisa man hinoon ang iyang tingog ug miingon “ipadakop!” Dihang akong giingnan nga dili ka ba mahadlok nga dakpon, mitubag pa g’yud nga “ipadakop!”

Nanaug ko ug akong giingnan nga padaplin kay isyuhan nako siya og TOP, diha pa mikalit og kahinay ang tingog nga mora’g piso nga nauwanan, nagsugmoy.

Gitudloan g’yud nako’g leksyon. Mao kana nga kamong mga drayber ayaw dayon kamo pag-awhag nga pausbawan ang pletehan sa jeepney kay dugay’ng panahon nga nagdawat mo’g subra.

* * *

Aron pagpa-epektibo sa kampanya batok sa mga badlongong drayber, isugyot nako sa kadagkoan sa LTO, nila ni direktor Raul Aguilos ug assistant director Edgar Catarongan nga magmugna og “mobile teams.”

 Dili man g’yud ko malipay nga magtan-aw aning mga drayber nga panahon sa gabii magpadagan nga walay suga. Nganong tuyoon g’yud kaha nila nga dili mopasiga sa suga.

Kun dunay halap-halap na og panan-aw mapugos sa pagtabok sa karsada kay wala man sila’y nakita nga sakyanan. Gawas pa, mahimo usab kini nga mabanggaan kay dili man dayon makit-an nga gadagan.

Kun ako’y makasakop og mga drayber nga dili magpasiga sa suga sa ilang sakyanan, dili g’yud ko malooy moisyu’g TOP bahala na og maibanan ang ilang kinitaan pagbayad sa multa.