Birhen sa Regla

Nobyembre 20 ug 21, Sabado ug Domingo karong tuiga, piyesta sa Birhen sa Regla sa dakbayan sa Lapu-Lapu. Gumikan sa pagka-milagrosa niini, hugopan kini sa katawhan, mag-uwan o mag-init, krisis o hamugaway ang kabutang, trapik o wala. Diha ganiy panahon sa mga bata pa kami nga gi-bagyo gyud, apan, daghan gihapong tawo.

Kinabag-an sa mga mamiyesta, ang Birhen gyud ang tuyo, secondary na lang ang kaon ug inom. Duha ka adlaw ang hikay, sa besperas ug kahulogan. Ang mga Misa kada adlaw sa maglakaw ang nobenaryo, pirmeng puno ang simbahan, ug taas kaayo ang linya sa buot mohawok sa Birhen.

Kahinumdom ko sa pahimangno, sa mga bata pa kami, sa among Lola Alipia, nga ang paghikay dili alang sa among bisita, kondili, alang sa mga bisita sa Mahal nga Birhen. Buot ipasabot nga ang dakung duot sa katawhan, wala mamisita sa taga-Opon, kondili namisita sa Mahal nga Birhen, ug igo lang kaming nag-abi-abi sa maong mga bisita ug mga deboto sa Birhen. 

Mao nga, matud niya, ayaw mog reklamo sa gasto sa paghikay tungod kay nag-entertain kamo sa mga deboto sa Mahal nga Birhen sa Regla. Midugang siya pag-ingon nga ang piyesta, panahon usab sa pagpasalamat, sa mga grasya nga nadawat, maoy hinungdan nga bisag unsaon pagpaningkamot sa pipila ka magbabalaud, pag-ban o pagdili na pagsaulog sa piyesta, wala gyud kini magmalampuson tungod kay alang kanatong mga Pinoy, taliwa sa atong kakabus, daghan kitag mga grasya nga nadawat, ug gikinahanglan ang pagpasalamat.

Ingon man, midugang si Lola Alipia, nga ang piyesta panahon usab sa pagpangaliyupo sa dugang pang mga grasya gikan sa Kahitas-an. Ug panahon usab paghinuklog sa mga kasal-anan nga nahimo ug pagpangayog pasaylo, uban sa tinguha nga sa kaulahian makauban kita sa Mahal nga Birhen didto sa Langit.

Alang usab sa uban, ang piyesta, panahon sa reunion sa mga sakop sa banay, sa kasilinganan ug kahigalaan. Sumaa, gawas sa mga kalihokan sa Simbahan, alegre gyud kaayo ang piyesta.

Maoy hinungdan nga dili maayo nga ato kining ihikaw sa katawhan. Dautan ba god ang piyesta ? Dautan ba ang pagpasidungog sa Patron ? Of course, makagasto ta, apan kining atong tinuig nga gasto, mao bay nakapaut-ot sa atong nasud ?

Gasto man gani tag minilyon ka pesos pagpakaon sa atong mga dagkung opisyales matag biyahe nila gawas sa nasud! Pila may mausik sa atong gobyerno gumikan sa corruption? Nganong dili man kini ang i-ban? Mogasto man ganig daku ang atong mga Kongresista matag away ni Pacquiao gawas sa nasud, nganong did-an man ta paggasto alang sa atong Patron?