EDITORYAL - Ikawalong bakus 'imortalidad' ni Pacquiao

Karong adlawa mohunong na usab ang pagtuyok sa kalibutan sa Pilipinas ug bisan asang dapit nga adunay mga Filipino ug Mehikano tungod sa sangka karong adlawa nila ni Filipino boxing icon Kong. Manny “Pacman” Pacquiao ug Mexican ‘Tijuana Tornado’ Antonio Margarito sa Cowboys Stadium sa Dallas, Texas.

Mao kini ang adlaw nga suwayan og kab-ot ni Pacquiao ang ‘imortalidad’ isip labing unang boksidor nga mokupot og walo ka nagkalain-laing weight division titles.

Wala pay bisan usa nga nakasuway og hawid og pito ka bakus nga kasamtangang gihawiran karon ni Pacquiao sukad nga naimbento ang paugnat sa kusog nga boksing.

Ug ang ikawalong bakus kang Pacquiao maisip na nga pagkab-ot sa ‘imortalidad.’ Tungod kay karong mga panahona lisod nang apason ang naabot ni Pacquiao (seven-weight division belts) ug dili na kini mapapas pa sa kasaysayan sa boksing. Mamahimo siyang topics sa mga boxing issues hangtud sa mosunod nga mga henerasyon.

Kini kun iyang mapukan si Margarito nga mas dako ug maoy giisip nga labing bug-at nga iyang makaatbang sa tibuok niyang boxing career.

Gipaabot nga dili lamang ang ordinaryong mga tawo maoy motan-aw sa maong sangka kundili lakip na niini ang mga kriminal, rebelde ug uban pa nga sama sa mga nasinati sa nanglabay’ng 12 ka mga sangka ni Pacquiao.

Mi-menus ang krimen, mikubos usab ang polusyon sa mga siyudad sa nasud tungod sa kagamay na sa sakyanang mobiyahe sa kadalanan ug labaw sa tanan magkahiusa ang mga Filipino sulod niining mga orasa.

Si Pacquiao usa sa mga maisip nga buhing bahandi sa Pilipinas karon tungod sa kadako sa dungog nga gihatag niini sa atong nasyon nga diin mapasigarbuhong giangkon ni Pacman nga siya usa ka Filipino atubangan sa minilyong boxing fans sa tibuok kalibutan.

Butang nga wala mahimo sa ubang mga Filipino presidente man o dili tungod sa kabaga sa mga nakaila kang Pacquiao isip labing unang boksidor sa kalibutan nga nakahawid og bakus sa pito ka nagkalain-laing weight division.

Busa kitang mga Filipino angayang mosuporta sa atong kababayan sa iyang sangka karong adlawa aron mabutang sa alimpatakan sa mga langyaw nga kitang mga Filipino usa sa labing kulba nga mga atleta sa kalibutan.