Hulga sa seguridad?

Human sa travel advisory nga giisa sa Australia, United Kingdom, Canada, New Zealand, United States of America ug France batok sa Pilipinas, karon makapaduda ba kun tinuod ang hinungdan nganong gitambagan sa maong mga nasud ilang mga tawo nga di’ una mobisita sa Pilipinas. Human giangkon ni Presidente Noynoy Aquino nga tinuod ang hulga sa terorismo, makapaduda gihapon kun tinuod ning tanan? Unsay nakapaduda sa publiko? Ang mga hut-ong sa gobyerno nga maoy gitahasan sa pagbantay sa seguridad sa nasud, nagdumili sa pag-angkon nga adunay hulga sa terorismo. Ang militar ug kapulisan nga maoy atong gisaligan nga modepensa kanato gikan sa mga badlungon sa katilingban, nanghunaw nang daan nga adunay kamatuoran ang tanan.

Nahu’g nga tumo-tumo o buot-buot lang ang nadiskobre sa mga nasud nga una nang nipagawas og travel advisory. Nahu’g nga bakakon si P-Noy nga maoy nikompirmar nga adunay hulga sa atong seguridad. Daghan na hinuon ang natingala nganong managlahi ang proklamasyon sa armadong kusog sa nasud ug sa kapulisan sa mga gipadayag sa presidente. Daghan ang nagtuo nga basin naglatay pa sa ugat sa militar ug kapulisan ang istilo sa kanhi administrasyon ni Arroyo nga bisan kun nabutang na sa peligro ang seguridad sa nasud, ipagawas nga normal ang tanan aron nga di’ malisang ang katawhan ug di’ mahadlok ang mga negosyante nga mosu’d sa nasud.

Buhi pa sa atong panumduman ang insidente sa Glorieta, tugpahanan sa Zamboanga ug uban pang insidente sa pagpamomba sa kaulohan ug Mindanao. Nasayod nalang ‘ta nga may hulga sa terorista dihang nibuto na ang bomba ug aduna nay mga kinabuhing nakalas. Sa sunod-sunod nga sitwasyon sa pagpa-momba pa niangkon ang gobyernong Arroyo nga adunay hulga sa seguridad. Karon, nalahi ang dagan sa hangin ug nabag-o ang pagtratar sa usa ka hulga. Mas gipili ni P-Noy nga iladlad sa katawhan ang tinuod nga sitwasyon sa seguridad sa nasud dili aron sa paghadlok kanato, apan aron nga kita mismo makapangandam ug makapanalipod sa atong kaugalingon.

Karon, giangkon sa ahensya sa depensa, militar ug kapulisan nga Nobyembre 1 pa nila nadawat ang intelligence report kabahin sa giingong giumol nga pagpangatake sa Pilipinas. Mas nauwahi pa pagkadawat sa taho ang atong mga gisaligan sa seguridad itandi sa mga dagko nga nasud nga una nang nipagawas sa ilang mga travel advisory. Dili ba ni dako nga bulilyaso sa atong sistema pagpanalipod sa atong nasud? Di’ ba bakikaw paminawon nga mas una pang nakapangandam ang mga adunahang nasud sa ilang mga tawo itandi sa natong mga Pinoy nga maoy direkta nga maapektuhan sa mga dautang lakang sa mga wa’y puangod nga mga terorista?

Luyo sa hulga, nagpadayon ang kalihukan ni P-Noy. Human sa iyang pagbisita sa Sugbo gahapon, karon tua sa Japan ang presidente aron motambong sa APEC summit. Bisan sa makapa-alarma nga hulga, wa’ malisang ang presidente ug nagpadayon sa iyang mga gimbuhaton. Luyo sa hulga, nibisita sa nasud ang kanhi presidente sa Amerika nga si Bill Clinton. Usa ni ka positibong punto tunga-tunga sa mga nigawas nga taho sa giingong pagpangatake sa mga terorista. Ug kung nahimo sa mga dagkong opisyal nga ipadayon ang ilang mga kalihukan, wa’y rason nga atong hunungon ang atong mga gimbuhaton tungod sa giingong mga pagpanghadlok.

* * *

Email: [email protected] or [email protected]