Pwerte nang luoya sa atong kabomberuhan gikan sa pagsaway sa nagkadaiyang sektor, mga biktima ug bisan na gani sa mga opisyales sa gobiyerno sukad pa kaniadto.
Kanunay’ng pagsaway mao kini: uwahing miabot, buslot ang fire hoses, gubaon ang firetrucks maong wala karesponde, kulang sa gamit, walay maayong komunikasyon ug uban pang dili na maayong paminawon.
Apan ang mga bombero bisan paman niini kanunay’ng moabot sa fire scene.
Ang mga bombero wala nay maayong mapaabot nga bag-ong gamit gikan sa mismong ilang ahensya tungod sa kakulang pirme sa ilang budget ug ang grabeng burokrasya nga agi matag adunay palitong ekipo tungod kay dugay kaayo kining makab-ot.
Ang bugtong gisaligan sa mga lokal nga kabomberuhan mao ang mga local government units nga mopalit og fire engines ug uban pang ekipo nga ipagamit o idonar nganha kanila.
Niining bag-ohay lamang nagtinguha ang dakbayan sa Sugbu nga mopalit og helicopter aron kuno magamit pag-monitor sa mga trahedya sama sa sunog, baha ug uban pa.
Dili ba salikwaot kaayo kun adunay ingon niining kahimanan ang dakbayan diha sa kahanginan isip “eye on the sky” apan wala magkadimao ang ekipo niini sa ground?
Tagpila karon ang abyon ug helicopter? Sa maong kantidad pila kahay mapalit nga fire ladder trucks, fire engines ug supertankers ug ingon man mga botas, uniporme, logistics, sweldo ug dugang personnel sa atong kabomberuhan ang mapalit?
Ang usa ka progresibong siyudad mas adunay seguridad kun aduna kini maayong pwersa sa kabomberuhan tungod kay kun aduna may bisan unsang kagubot nga makamugna og kadaot ang bombero may mopugong nga dili kini mograbe.
Ning paagiha momenus ang danyos ug daling makarekober ang usa ka dapit.