Ambot kun di ba kaha mohiwasa’g mokisikisi si Gobernador Gwen karong gikulata na usab og saway ni Kongresista Tom ang lalawigan sa Sugbo.
Unya maayo lang kuno modisplay ang gobernador sa iyang dagway ug kabayo apan ang mga kalungsoran sa lalawigan nga pasuroyan niya sa mga turista way pansayan.
Unya ang lalawigan wa gyud kunoy mga tag-as nga edipisyo alang sa mga call center, lahi sa dakbayan sa Sugbo nga murag uhong ang naglumbaanay kahabog ug katag-as nga mga edipisyo ug mga call center. Konklusyon, kini maoy hinungdan nga nawala sa mapa ang lalawigan sa Sugbo sa listahan sa labing matahom ug nindot nga suroyanan sa mga turista sa nasud.
Kay ang maong korona, matud pa ni Kongresista Tom, nailog na sa lalawigan sa Camarines Sur.
Busa imbis anhi siya modayeg sa gobernador sa lalawigan nga pirmeng nagbansiwag sa pamantalaan ang iyang matahom nga panagway ug ang maayong pagkalalik nga lawas ilabi na kun magsakay sa iyang kabayo, tua na modayeg sa gobernador sa Camarines Sur.
Hinuon usa sa mga punto gyud sab tinuod nga nahisgotan ni Kongresista Tom mao ang bahin sa pansayan.
Sa pagkatinuod mas maayo pang walay tubig ug kuryente ang usa ka lungsod, basta may limpiyo lang kining pansayan nga kapahungawan sa mga dumuduong sa ilang mga suliran sa lawas.
Kay bisan sa panimalay, kun may labing limpiyo nga bahin sa balay walay lain kundi ang pansayan. Unya ngano ba gyung ang gobernador may basulon ni Kongresista Tom bahin sa pansayan nga naa may mga mayor nga angayang mopatuman niini diha sa kalungsoran?
Kung masil-ingan sa gobernador ang mga esteros ning dakbayan nga puwerting hugawa unsa man usab kaha ang ikatubag ni Kongresista Tom nga sa iyang pagka-mayor sulod sa pila ka tuig wala ra ba gyud kini masulbad,
Usa sa mga ehemplo niini, mao ang estero sa Palma, abi ninyo, kanang mga bayot nga tig-estambay diha makaadlawon nga anha ra usab moiwang, manimahong lapok ang lawas tungod sa hilabihang kabaho ug kahugaw sa inalisngaw ug hinungaw sa maong sapa-sapa, kay dili na tubig ang anaa niini kundili lapok na.
Unya ang nakapait kay di lang bayot ang moiwang diha ,adlaw ug gabii, kundi bisan ang mga molupyo diha nga walay pansayan.
Aber, unsa kahay ikapangatarungan ni Kongresista Tom niini kun iyagyag na usab kini ni Gobernador Gwen.