Kay si Jean Valjean nagdala-dala sa mga platang kinawat gikan sa balay sa Obispo mao nga mga polis ang midala kaniya pagbalik sa maong Obispo aron tukmang sumbong ang ikapasaka kaniya sa ingon siya, mabilanggo. Apan ang Obispo nagkanayon: “Dili man kawatan si Jean Valjean, akong gihatag ingon nga gasa ngadto kaniya kining maong mga plata.” Sa dihang nakabiya na ang mga polis, ang Obispo nagkanayon: “Isaad kanako nga gamiton mo unta ang maong salapi diha sa pagtinarong!” Sukad niadto adunay dakong kausaban ang nahitabo sa kinabuhi ni Jean Valjean.
Pamalandong
Ang pagpasaylo ug gugma dako kaayo og ikatabang diha sa pagdala og kausaban sa usa ka tawo. Dako kaayo ang bationg kalipay sa Dios nga atong Amahan kun usa sa iyang mga anak nga mga makasasala ang mahinulsolong mobalik kaniya.