Ang panagtagbo ni Jesus ug ni Sakeyo ang maisip natong interesante kaayo. Kini tungod kay ania nakigsalo na usab siya sa giisip nga makasasala sa ilang kapanahonan. Sa mata sa usa ka Pariseo usa kini ka dakong binuang ug dili haom nga pamatasan nga ipakita sa usa ka tinamod nga magtutudlo sama sa atong Ginoo. Ang atong Ginoo sa laing bahin, ang nahimong makanunayon sa iyang misyon nga mao ang pagpangita sa mga nawalang mga karnero sa Israel. Alang kaniya, mahinungdanon kaayo kining panagtagbo nga tungod niini buot siyang modayon sa balay ning maong mubo nga tawo nga usa ka Kobrador og Buhis. Alang kang Sakeyo usa kini ka dakong dungog nga ang magtutudlo mosulod sa iyang panimalay.
Ang maong panagtagbo ang nagdala usab og kausaban sa kinabuhi ni Sakeyo. Ang presensiya ni Jesus ang naghimo kaniyang molaum nga dunay kaluwasan diay nga nagpaabot sa mga tawo nga sama kaniya. Adunay nahimong bunga ang iyang kakuryoso ning maong Magtutudlo. Adunay nindot nga bunga usab ang iyang malipayong pag-abi abi ning maong magtutudlo.
Sa tanang panahon ang Dios wala magtungina sa iyang KALOOY alang sa mga Makasasala. Usa ka dakong kalipay alang kaniya nga ang usa ka makasasala mobalik ngadto kaniya. Apan lahi kitang mga tawo. Maglisud kita paghatag sa atong pasaylo kanila nga nakasala kanato. Kining maong sugilanon ang magsaysay niini:
Pasaylo
Bro. Andrew Ma. Almonte, MMHC
Usa ka adlaw niana, duha ka mga manggugubat nga sila si Taitoki ug Saisoki ang nihimo og usa ka dwelo. Managsama silang hanas sa paggamit og espada. Sa ilang panag-away, nakabaton sila’g duha og mga samad dinunggaban. Tungod sa maong hitabo, naundang una ang ilang panagsangka, apan wala gihapon nila mabatoni ang pag-areglohay.
Milabay ang daghang mga adlaw apan wala maalim ang samad nga ilang nabatonan gumikan sa ilang panagsangka. Padayon kining nagngulngol ug padayon kining nagpabiling lab-as taliwala sa mga nagkadaiyang mga tambal nga ilang gihunad. niini. Ang maong suliran, nakapaaghat kanila nga magpakitambag kang Maoki nga maalamon.
Ang ilang mga kalibog gitubag ni Maoki nga maalamon ning mosunod nga tambag: "Nagpabiling lab-as ang inyong mga samad, kini tungod kay managsama kamong wala makapasaylo sa matag usa kaninyo." Mao nga hangtud karon daghan gihapon ang nahimong mga madinumtanon ug kay nagdumot man ang walay kalinaw hangtud karon..."