EDITORYAL - BIR vs. taga bangko

Mibahad ang taga Bureau of Internal Revenue (BIR) nga gukdon nila ug silota’g apil ang mga opisyal sa bangko nga mo-alalay sa mga tax evader kon magbubuhis nga di mobayad og buhis.

Kini usa ka maayong opinion nga karon pa mahunahunai sa taga Department of Justice (DOJ). Kining maong bisyo dugay na kaayong mihari dinhi sa nasud  ug walay nakahimo sa pagpapriso niadtong taga bangko nga motabang sa mga malditong negosyante sa paglingla sa gobyerno pinaagi sa dili pagbayad sa ilang buhis.

Walay laing gipiyalan ang kagamhanan sa paggukod sa mga taga bangko nga motabang sa mga negosyanteng tikasan kundili ang BIR.

Ang mga negosyanteng tikasan, bisan moburot na pag-ayo sa ilang bahandi, dili maikog sa mga kabus nga mga kawani kinsa luyo sa kagagmay og kinitaan, gisiguro pagpaningil sa gobyerno sa ilang bayranan sa buhis.

Pero ambot kaha kun isog ba ang taga BIR sa paggukod sa taga bangko nga moalayon sa mga di mobayad og buhis.

Kay wala ba mahitabo nga nahimong sumsoman ang bisyo sa ubang opisyal sa BIR? Wa bay magbubuhis nga may bayranang P100,000 ug dihang mihangyo nga pagamyan ang iyang bayranan dali kaayong misugot ang opisyal nga iyang giduol.

Unya wala ba mangondisyon nga puwedeng himoong P50,000 lay bayran sa magbubuhis, apan P5,000 lay himoan og official receipt?

Busa di kaha sagkaon ra kaayo sa usa ka opisyal sa BIR ang paggukod niadtong taga bangko nga moalayon sa mga tikasang magbubuhis kun inigsusi niya sa iyang kaugalingon labaw pa siyang bilyako kay sa taga bangko?