Gipug-ok ni Noynoy

Unsa may nahimutang sa mga pahina 61 ngadto sa 82 sa report sa IIRC (Incident Investigation and Review Committee) nga nagdumili man si Presidente Noynoy Aquino pagpagawas nila ngadto sa publiko? Ang bugtong katin-awan sa Malakanyang mao nga di makiangayon nga mabasahan nang daan ang kinatibuk-an sa mga rekomendasyon sa IIRC samtang nagsubli pang mga abogado sa palasyo. Apan wa ning kapugong ni Aquino paghatag sa tibuok report ngadto sa People's Republic of China.

Wa hinuon mangiyugpos ang media pag-utingkay sa gitagoan nga bahin sa report. Usa ka sakop sa IIRC ang nipalili nila sa tulo ka gitagoang pahina. Nga nag-detalye sa mga kasong kriminal ug administratiba nga girekomendar nga ipasaka batok sa mga gilambigit sa hostage crisis.

* * *

Ang nabisto nga pasiunang tulo ka pahina nagmatuod nga sayop ang pahibawo ni Presidente Aquino nga girekomendar sa IIRC ang pagkiha sa tulo ka higanteng TV networks nga nag-live coverage sa krisis. Ang gipakiha sa IIRC mao ra diay silang Michael Rogas ug Erwin Tulfo sa DzXL tungod sa ilang pakighinabi ni hostage taker Rolando Mendoza dayon niyang pamusil sa langyaw’ng mga bihag. Ang ABS-CBN, GMA ug ABC igo lang nilang gipa-imbestigar sa KBP (Kapisanan ng mga Brodkaster ng Pilipinas).

Apan karon gibisto sa PCIJ (Philippine Center for Investigative Journalism) ang tanang 21 ka tinagoang mga pahina sa IIRC report. Ug nabantang na nga determinado gyod si Aquino pagpanalipod nilang Manila City Mayor Alfredo Lim, DILG Undersecretary Rico Puno ug kanhi PNP chief Jesus Verzosa.

* * *

 Niang mga sukaranan sa IIRC pagkiha ni Lim:

• May igong ebidensiya sa pasangil nga gimando ni Lim ang pagpapatay ni SPO2 Gregorio Mendoza dihang iyang giawhag ang kapolisan pagda sa igsuon sa hostage taker ngadto sa "Tondo" nga posibleng maoy hinungdan nga nagkabang-kabang ang tingog ni Mendoza pagpakitabang sa media;

• Way ebidensiya nga gipalihok ni Lim ang Crisis Management Committee;

• Iyang gisalikway ang sugyot ni Chief Negotiator Orlando Yebra nga kasamtangang ibalik sa puwesto si Rolando Mendoza human nasuko sa suwat ni Ombudsman Merceditas Gutierrez; ug

• Gibiyaan ni Lim ang command center, gikuyog pang ground commander nga si Heneral Rodolfo Magtibay sa Emerald Restaurant kay gigutom na bisan nihagsa nang sabutsabot ug nagpabuto nang hostage taker.

* * *

Nia sang mga sukaranan sa IIRC pagkiha nilang Puno ug Verzosa:

• Napakyas si Puno pagpalihok sa National Crisis Management Committee;

• Way gahom si Puno pagduma sa krisis kay si DILG Secretary Jesse Robredo ang angay’ng mopalihok sa nasudnong komitiba;

• Wa pahibaw-a ni palihoka ni Verzosa ang mga sakop sa NPOCCMC (National Peace and Order Council-Crisis Management Committee) mahitungod sa pagkabihag sa mga Pinoy ug langyaw’ng mga turista; ug

• Wa magkasinabtanay silang Puno ug Verzosa unsaon pagduma ang krisis.

* * *

Email:[email protected]