Pagklaro mo uy!

Kadtong mga kawani nga dunay pending nga mga “loans” sa Social Security System (SSS) nga wala na bayri sa dugay na nga katuigan maoy maayong himoan og aksyon sa SSS.

Sa akong pagtimbang-timbang dili kaayo haum ang gihimo sa SSS nga iapil kadtong ubang kawani nga nagbinuotan tungod lang kay naghalhal ang tagdumala sa ilang mga kompaniya.

Ang gipasabot nako tungod kay daghan kaayo karong mga kawani nga gusto unta nga mo-apply og loan sa SSS apan dili tugotan kay dunay uban sa ilang kauban sa trabaho nga wala mobayad sa ilang utang, apil na kadtong namahawa na.

Paita ani uy. Luoy kaayo kadtong mga wala gayo’y laing kapaingnan. Asa man sila mangita og kaduolan?

Masakripisyo sila tungod lang sa binuang sa uban nila nga mga kauban sa trabaho.

Ang maayo nga himoon mao nga kining maong mga kawani maoy himoan og aksyon.

Basta akong klarohon, wala ko’y pending loan sa SSS nga wala kabayri. Gitan-aw man gud nako ang listahan sa mga kawani nga utangan pa, ang uban patay na man gani.

Ang angay’ng buhaton sa mga HRD personnel sa lainlaing kompaniya adtoa ninyo ang SSS ug pahibaw-a kinsa sa mga ngalan nga anaa sa lista ang wala na magtrabaho ninyo.

Apan kadtong uban nga nagtrabaho pa, himoi og mga pamaagi nga ang existing loans mabayran sa maong mga kawani sa data-data nga paagi.

Daku kaayo kini nga problema kun dili dayon matagad. Unya, kadtong uban miingon nga dili magpa-iban og bayad sa SSS, ang kompaniya man usab ang manubag.

Ang SSS law naglatid nga ang usa ka kompaniya kinahanglan nga moiban gayud og SSS monthly contributions sa ilang mga sakop ug i-remit kini sa SSS.

Kun dili nila kini mahimo, manubag sila sa balaud.

* * *

Apan lain pay ato, mas labaw tingali nga manubag ang mga employers nga mangolekta og para bayad sa SSS apan dili i-remit.

Ang uban namong gwardya diri sa The Freeman nag-andam na og reklamo nga ilang isumiter sa SSS batok sa ilang ahensya ang Sikatuna Security Agency.

Ireklamo na g’yud nila sa SSS kay matud sa mga gwardya wala gi-remit sa ilang ahensya ang gikolekta kanila sa daghan na kaayo nga mga buwan.

Nakadungog sila nga human nato gi-expose kining maong binuang, ang ahensya nila misugod na pag-remit, apan wala gayud sugda sa sinugdanan gikan sa ilang pagsugod og trabaho.

Paita ninyo uy. Ang giiban ninyo sa kontrata gikan sa The Freeman subra pa kaayo sa gilatid nga 20 porsiyento, unya wala pa g’yud ninyo gi-remit ang giiban ninyo sa ilang sweldo?

Dunay nag-ingon nako nga buotan kuno kini si Colonel (Ret) Arias, ang tag-iya sa ahensya. Basin og wala ka masayud ani Sir? Pero, imposible nga wala ka masayud.

Hangyo nako sa mga tagdumala og mga security agencies nga tumana ninyo ang tukmang lagda sa pagbahinay sa sweldo, kun pila ang para sa ahensya ug sa gwardya.

Dili g’yud mo makalimbong nako niining maong isyu kay gitun-an nako kining maong balaud kaniadto pa.

Kinsa pa man kaha ang ganahan nga mokuha sa inyong ahensya kun ingon niini ang inyong pamaagi Sir?

Posible pa gani nga ang mga gwardya dili na usab mangaplay sa inyong agency. Asikasoha ang problema sa inyong gwardya aron dili maglabad ang inyong ulo unya.

Palihug usab, ayaw mo panghulga nga ipa-revoke ang lisensya sa mga gwardya nga igo lang mireklamo nga wala i-remit ang gikolekta gikan kanila. Tell that to the marines!