EDITORYAL - Paglegalisar sa jueteng

Ang tawong sugarol, sugarol gyud , apan ang di sugarol dili gyud manugal, sama ra sa sigarilyo diin ang tawong hinigarilyo, mas kabiyaan pa ang asawa kay sa sigarilyo (sumala sa uban) apan ang dili manabako bisag bukotan pa sa daghang aso sa sigarilyo matag adlaw dili gyud na manigarilyo.

Kini may labot sa gikagubtang isyu karon nga mao ang bahin sa balaodnon ni Senate Pro Tempore Jinggoy Estrada nga naglegalisar sa sugal nga jueteng.

Gisandig sa maong senador ang iyang prinsipyo sa paglegalisar sa maong matang sugal sa kakaraan na niini, nga nanukad pa sa panahon sa mga Katsila apan wala’y balaod sa gobyernong misaler sa pagpitol niining sugala busa wala gyud makasapi ang gobyerno sa maong sugal.

Kini tungod kay gipadagang kinawat-kawat sa pribadong mga negosyante nga kusog kaayo molawog og dagkung bulto sa kuwarta ngadto sa mga tigpatuman sa balaod.

Dihang nakita ni Estrada nga bulsa ra sa mga ilegal nga negosyante ug sa pipila ka mga otoridad sa gobyerno ang nabulahan sa maong sugal, nakahukom kini sa pagduso og balaodnon sa paglegalisar sa maong sugal diin gobyerno nay mopadagan pinaagi sa Philippine Amusement and Gaming Corporation (PAGCOR).

Adunay panagna sa uban nga kadtong mga magbabalaod nga modupa aron pagsupak niini , tungod malagmit kay mawad-an sila’g dagkong kinitaan kun gobyerno nay mopadagan sa maong sugal, daghan kaayong ihapin nga katarungan, ug usa na niini mao ang matud pa makapadaghan sa krimen, sama sa kawat, tulis ug pangilad aron may ikaposta sa jueteng.

Baya pa ba, kay ang giligalisar diay nga lotto, sweepstakes, ug uban pa, may isyu ba nga nakapasamot kini sa kaso sa pangawat, panulis, pangilad ug uban pang krimen?

Apan labing siguro nakapabulahan sa panudlanan sa gobyerno, ug por eso , sama sa mga nalegalisar na mga sugal, mas maayo pang panudlanan sa gobyerno ang makasapi kay sa pipila lang ka bulsa sa mapahimuslanong mga tawo, kun ugaling mahimong legal ang pagpadagan sa jueteng.