EDITORYAL - Baga'g nawong

"I'd rather have the thin hair than the thick face."

Mao kini ang panumpa ni Pres. Benigno Simeon Aquino III ngadto sa Filipino community sa California niining iyang pagduaw sa Amerika pagtambong sa General Assembly sa United Nations.

Sa Sinugboanon pa, mas pilion niyang nipis iyang buhok kay sa baga iyang nawong. Dungan kini sa panaad ni Pres. Aquino ngadto sa mga Pilipino sa Estados Unidos nga dili niya pakyason ang pagsalig niya sa katawhang Pilipino.

Dakong hagit sa mga kawani ug opisyal sa gobyerno kining panumpa ni Pres. Aquino nga dili siya magpabaga sa nawong.

Ang pangutana, andam ba sundon sa mga kawani ug opisyal sa gobyerno kining hagit nga anaa nakapilit sa panaad sa presidente?

Tataw kaayo nga ang gipadungogdungog sa maong pamahayag ang kanhi pamunoan ni kanhi presidente nga karon Kongresista Gloria Arroyo. Kini tungod sa mga anomalosong transaksiyon - gikan sa ZTE broadband deal, Hello Garci tape, ngadto sa fertilizer scam - nga wala gani kahatagi og sulbad ug walay napasakaan og kaso tungod sa pagkahaguka sa Ombudsman.

Hinaot dili lamang kutob sa pagdungogdungog ang administrasyong Aquino. Tinud-on niini, angayan lamang, nga ipadayon ang pag-imbestigar sa Truth Commission sa mga kahiwian sa miaging administrasyon sa tuyo nga makapanubag kadtong nalambigit sa maong mga binuang ug mahimo usab nga leksiyon sa mga opisyal ug kawani sa gobyerno.

Dili ikalimod nga sa mga ahensiya sa gobyerno, aduna pa gyuy mga baga og nawong nga padayong nagpaka-dato diha sa ilang mga posisyon.

Kun buot usab ni Pres. Aquino nga dili siya magpabaga og nawong sa katawhang Pilipino, angay usab niyang wad-on sa iyang administrasyon ang mga baga'g nawong pinaagi sa paglig-on sa Ombudsman. Ug kun ang Ombudsman sama kahaguka sa administrasyong Arroyo, aduna siyay higayon sa pagpa-impeach sa mga nagdumala niini.

Kay kun walay Ombudsman nga ingon ka-abtik mopa-nipis sa mga baga'g nawong sa gobyerno, magpadayon ang ilang pagpabaga sa nawong sinakripisyo ang katawhan.