Ayaw na pasayloa

Angay’ng tinud-on pa ni market administrator Raquel Arce ang paglimpyo sa Taboan public market ingon man sa ubang merkado.

Kun dunay mga stall holders nga mohimo’g salaud o kasupakan sa lagda sa market code, angay sila nga pahamtangan sa tukma nga silot kay kun dili kini tagdon magtuo sila nga husto ang ilang gihimo.

Sa report ni market administrator Raquel Arce ngadto ni Atty. Jose Mari Poblete, ang city administrator ug chairman sa Market Authority, siya nagkanayon nga nasakpan g’yud niya nga si Edgardo Briones Jr. nga usa ka stallholders sa Taboan nagpainom sa iyang mga higala didto sa merkado.

Kini si Briones daan na kini nga nakahimo og kalapasan pinaagi sa paghimo sa iyang stall No. 134 nga katulganan o pinuy-anan inay nga gamiton kini isip tindahan.

Alang nako mas maayo nga sakmitan kini si Briones og stall. Ingon ana ang pagpadagan sa merkado, kinahanglang matinud-anon ka sa pagpatuman sa mga balaud.

Kun dunay dili maayo nga gihimo ang mga stallholders aksyonan dayon mentras wala pa makadaku ang ilang kalapasan.

Ang ako lang mao nga ang in-charge unta sa Taboan market nga si Lucino Calvo, ako man kining higala, mosugod na unta paghimo’g kampanya batok sa mga kawatan og kuryente.

Daghan kaayo diha nga stalls nga anaa ra magkuha og kuryente sa koneksyon sa merkado. Makaako ra ba diay kamo nga maalkanse ang dakbayan tungod sa ilang abuso?

Sama anang pagbutang sa baligyang bugas diha sa agianan sa mga tawo, nganong itugot man kana nato? Aron ba g’yud nga kahatagan nato og puy-anan ang maong mga tindera’g bugas?

Wala ba ninyo matan-aw nga air-condition ang ubang mga stalls kay gihimo na man nila nga balay? Pastilan, lihok na intawon mo sa inyong trabaho.

Kun dili makaya kay mahadlok kamo sa mga vendors, alang nako welcome ang buhatan sa mayor nga modawat sa inyong mga irrevocable resignation.

Alang nako mauwaw ko nga mopilit ko diha sa trabaho nga dili ninyo matuman ang gitahas kaninyo.

Ang market administrators office dunay mga sakop sa gitawag nila og market operations division. Kini sila maoy gitugyanan sa paghawan sa atong mga merkado.

Suroya ninyo ang kamerkadohan unya tabangi ang mga market-in-charge sa ilang gimbuhaton. Dili kay magsigi lang mo og bandyeng-bandyeng diha aron makit-an nga taga market operations division mo.

* * *

Dunay usa ka lumulopyo sa karsada Kamagong nga mipadala og suwat-reklamo sa CITOM batok sa mga sakyanan nga anha mamarking duol sa Parklane Hotel ingon man sa atubangan sa ilang balay.

Apan talawan man kaayo magpaila. Kun usa pa ka lalaki ang mireklamo makaingon unta ko nga bayot.

Maayo pa ang akong kauban sa opisina, ang among opinion editor nga si Debbie Duraliza kay wala pa mahadlok nga nanguha’g hulagway sa mga sakyanan nga nakalapas sa lagda.

Unya, kanang unipormado nga tanod sa barangay Kamputhaw nga anaa gidistino sa tanod outpost dapit sa eskena ug atubangan sa Parklane Hotel badlonga usab tawon kanang mga sakyanan nga mamarking diha sa eskena.

Kun dili ka makabadlong sa ubang sakyanan, kana na lang anaa sa 10-metros nga distansya gikan sa eskena kay wala gayud kana itugot sa balaud sa tukmang pagmaneho.