Nahuman na ang imbestigasyon sa grupo nga gipangulohan ni Justice Secretary Leila de Lima sa labing kontrobersyal nga insidente nga nahitabo ubos sa bag-ong administrasyon ni Presidente Noynoy Aquino. Ang 83-page report pormal nang gitunol sa grupo ni de Lima ngadto ni P-Noy una ni pormal nga ipagawas sa media. Giingong apil sa kasuhan ang 12 ka mga personalidad lakip na ang mga sakop sa media tungod sa nabulilyaso nga paghupot sa hostage nga nisangpot sa pagkamatay sa 9 ka mga tawo lakip na ang hostage taker. Ang dakong pangutana karon, kontento ba ang kagamhanan sa Hongkong sa resulta sa imbestigasyon?
Apan wa’ pa gani mapasaka ang kaso, laing kontrobersya na ‘sab ang giatubang karon sa administrasyong Aquino. Nipiyait ang mga sakop sa media ug ubang sektor tungod kay matod pa, mas una pang napahibawo sa Malacanang ang gobyerno sa Hongkong kabahin sa resulta una ni ipagawas dinhi sa nasud. Kung tinuod man, nagpasabot ba ni nga ni-ampo na ang administrasyong Aquino sa Hongkong kansang mga tawo maoy sagad nga biktima sa hostage crisis nga niabot og siyam ka oras? Kung hangtud sa maong punto, mahimong itoy ang gobyerno, asa naman ang gipanghambog sa mga unang adlaw sa imbestigasyon nga di’ mahimong magpadikta ang gobyerno sa Hongkong?
Bakikaw paminawon nga dinhi sa Pilipinas nahitabo ang krisis nga gitutokan sa daghang nasud sa kalibutan ug nga Pilipinas ang naka-angkon sa grabeng uwaw tungod sa sunod-sunod nga palpak sa operasyon apan ang ubang nasud ang mas una nga makahibawo sa resulta sa imbestigasyon. Kung adunay may maayong himuon ang administrasyong Aquino karon, kana mao ang pag-ilis sa iyang mga advisers tungod kay sukad nga nilingkod ang bag-ong presidente, wa’ sa iyaha maggikan ang palpak nga mga desisyon apan ana-a sa mga tawo nga naglibot kaniya. Kung ang miaging administrasyon hanas sa iyang pagkahawod, karon ang gobyernong Aquino daw magpanuko ug maikog nga mohimo sa mga lakang nga alang sa kadaghanan.
Di’ masukod ang epekto sa hostage crisis nga gibalandra sa mga mantalaan ug nahimong labing gitutokan nga live drama sa kalibutan. Busa, nagkinahanglan nga susihon ug sigurohon nga alang sa kaayohan sa nasud ang mga mosunod nga lakang sa gobyerno aron sa pagbawi sa namantsahan nga imahe sa nasud. Kung nahitabo sa ubang nasud ang susamang krisis sa mas grabe pa nga estado, di’ kini igo aron moingon ‘ta nga mahitabo sa bisan asang bahin sa kalibutan ang hostage crisis. Ang labing dakong pangutana karon, unsaon sa Pilipinas sa pagbawi ang pagsalig sa ubang mga nasud sa kalidad sa seguridad dinhi sa ato human nila makita ang mga palpak nga lakang sa atong otoridad.
Wala sa 83-page nga report sa grupo ni de Lima ang hustisya nga gipangayo sa mga kabanay ug labaw nga wa’ sa committee report ang hustisya nga gisinggit di’ lang sa mga biktima apan lakip na sa daghang mga Pinoy nga naapiki tungod sa maong kontrobersya. Ang tinuod nga hustisya, ana-a sa pagsilot sa mga tawo nga may nahimong salaud ug maoy naka-ingon sa duguong resulta sa 9 ka oras nga hostage fiasco. Kung nahimo sa ubang nasud pagbangon human sa mga krisis, di’ imposibleng mahimo ‘sab ni sa Pilipinas. Ang labing gipaabot nalang karon mao ang mga lakang nga himuon sa gobyerno aron hingpit nga makagawas sa kontrobersya.
Gidayeg nato ang pag-utingkay nga gihimo sa gobyerno sa mga ahensya nga nalambigit sa kurapsyon, apan ana-a sa paghatag og tinuod nga silot ang hustisya. Mao ‘sab unya ni ang mahitabo sa hostage fiasco nga nahitabo sa miaging buwan. Ang hostage crisis ang maisip nga labing dakong problemang gisagubang sa bag-ong pamunoan nga nagkinahanglan og tukmang solusyon aron magpabilin ang pagsalig sa katawhan sa gipasigarbong bag-ong paglaom.
* * *
Email: rico_lucena@abs-cbn.com or ricolucena@yahoo.com