Tunto!
Dugay na ko’ng nakadungog sa giingong kalambigitan sa sinagop ni Talisay City Mayor Socrates Fernandez sa negosyo sa illegal nga drugas apan wa gyuy ebidensiya nga momatuod niini sanglit wala pa man sab siya madakpi nga namaligya og shabu.
Dugay na si Joavan nga gidungog nga adik-adik, gani daghan man ang nagsugyot nga ipaubos siya sa drug rehabilitation. Namatud-an sab gyud siyang tiggamit og illegal nga drugas dihang gipaubos sa drug test sa National Bureau of Investigation.
Kamatuoran niini pending ang kaso paggamit og drugas batok niya. Karong bag-o ang nangangkong kanhi bodyguard ni Joavan nga si Guillerma Barrido midangop sa kapolisan tungod sa kabalaka sa iyang siguridad.
Namasangil siyang gihulga sa grupo ni Joavan tungod sa kasuko niini nga siya mibiya duha na ka semana ang nakalabay. Matud niya nga wala na siya kaagwanta sa pagpunay og singhag ni Joavan ug sa pagpanion niini og armas kaniya.
Atol sa iyang pagdangop sa Pardo Police Station giingong gitug-an ni Barrido ang illegal nga kalihukan ni Joavan sama sa pagpamaligya og drugas. Supplier ni Joavan matud ni Barrido ang usa ka sakop sa Philippine Drug Enforcement Agency kun PDEA.
Daling gihimakak sa acting regional director sa PDEA nga si Adrian Alvarino ang pasangil ug mihagit ni Barrido nga nganlan kinsay supplier ni Joavan. Matud ni Alvarino sigurado siya sa iyang mga sakop nga way nalambigit sa tinunto. Ngano kanunay siyang nagbantay sa iyang mga sakop?
Bisan giabswelto na niyang daan ang iyang mga sakop gikan sa pasangil apan naghilas-hilas gihapon si Alvarino pagpasalig nga iyang susihon ang pasangil ni Barrido. Tunto! Unsa may kapuslanan sa imong imbistigasyon og gihukman na nimong daan nga pulos santos imong mga sakop ug dili kamaong makasala.
Basin nagdamgo lang si Alvarino, pukawon tika, pinaagi sa pagpahinumdom giunsa pagtulis sa mga sakop sa PDEA kaniadto ang usa ka muslim nga tindero og relo diha sa Fuente. Dili pa hinuon siya maoy regional director sa PDEA niadtong higayona apan mura man gud og bilib kaayo siya nga mga santos ang iyang mga sakop.
Ang hustong gihimo ni Alvarino mao nga gipasusi una ang pasangil sa wala pa mangabogar sa iyang mga sakop. Wala man sab kay kalainan ni Mayor Soc Fernandez nga labihan ka konsintidor sa iyang anak.
* * *
Tan-awa og unsa gyud ka konsintidor si Mayor Soc, dili lang ni Joavan kun dili lakip sa mga barkada niini. Bisan og unsa ka dako sa bulilyaso nga nahimo ni Benedict Gabasa apan giduphan gyud gihapon siya sa dakbayan.
Tiaw mo bisan dili empleyado giangkon na lang nga job order employee nga tua idistino sa feeding program ni Joavan. Nganong duna may feeding program si Joavan, unsa man siya opisyal sa lungsod?
Kinsa may nakabenepisyo nianang maong feeding program? Dili kaha shabu maoy ilang gigamit sa feeding? Ang Ombudsman angayan na pud nga molihok pagpitol sa kakonsintidor ni Soc.
Ang iyang pagtugot nga gamiton ang service vehicle sa iyang buhatan sa kalihukan sa iyang sinagop dako ning atraso sa balaud ug sa mga Talisaynon. Tiaw mo og tinuod nga namaligya og drugas si Joavan, sakyanan sa gobyerno maoy iyang gigamit sa illegal nga negosyo?
Labing siguro gigamit na nila ang maong sakyanan paghingos og shabu kay duna may mga paraphernalia paghingos og drugas nga nasakmit ang kapolisan.
* * *
- Latest
- Trending
