Gamay'ng milagro

Dunay mga ginagmay apan makapalig-on sa atong pagtuo nga nahitabo didto sa Simala adtong kasaulogan sa birthday ni Mama Mary. Ginganlan kini sa uban nga gagmay’ng milagro.

*  *  *

Matud pa sa suki tang magbabasa nga si Rod Tan usa sa maanindot nga iyang nasaksihan adtong Sept. 8, kasumaran sa pagkatawo ni Mama Mary, mao kadtong meeting sa duha ka manag-klasmet dinhi sa Cebu nga wala na magkakitaay sud sa 40 anyos.

*  *  *

Si Rod Tan misugilon kanato nga si Carmen Jaspe ug Tilde Canillas dungan nga mi-drop out sa kolehiyo gumikan sa nagkadaiyang hinungdan. Sukad adto wa na sila magkakita kay si Carmen taga Bohol man ug si Tilde taga Davao.

*  *  *

Nagkakurus ang ilang dan didto sa Simala atol sa selebrasyon sa kaadlawan ni Mama Mary. Matud ni Rod “nagbaha” ang mga luha dihang ang duruha naghinilakay. Kuwarenta ka tuig gud nga wa sila magkakita. Pulos na ubanon ang buhok.

*  *  *

Gikatakda sa sunod adlaw ang ilang pagpauli sa ilang tagsa ka lungsod apan kini na delatar og duha ka adlaw kay human sa selebrasyon sa birthday ni Mama Mary ila nasab gisilibrar ang ilang panagkita human sa 40 ka tuig.

*  *  *

Nanuroy sila sa mga dapit dinhi sa Sugbo nga ila kanunay’ng suroyan sa estudyante pa sila dinhi. Apil na kuno sa mga dapit diin sila magkanunayan sa ilang mga boyfriends nga ila na ron mga bana.

*  *  *

TRIVIA -- Daghang salamat kang migong tunay nga si Loy Jurado sa iyang pagbisita nako adtong usang gabii. Wala ako makatagad, Loy. Salamat Loy, amigo gyud kang tunay.