Moreklamo g'yud ta

Angay g’yud nga kampanyahan sa Market Authority dinhi sa dakbayan sa Sugbo kadtong mga tindera nga anaa na magpuyo sa mga merkado. Ang merkado angay g’yud nga limpyo kay pagkaon gud ang gibaligya diha, apan kun ang mga tindera anaa na magpuyo unsa may mahitabo?

Tiaw mo gidala pa sa ubang tindera ang gagmay nila nga mga anak. Pastilan, mahuna-huna nako unsa kahugaw ang mga merkado nga gipuy-an na sa mga tindera ug nagdala’g mga bata.

Dasigon nako si Market administrator Raquel Arce nga dili magpanagana sa paghimo og operation.

Ingon ana man g’yud ang pagpanerbisyo, dunay masuko ug duna say malipay. Kun ipatuman nato ang balaud, pipila ra ka tindera ang masuko apan daghan ang malipay.

Isakripisyo ba diay nato ang kadaghanan aron lang g’yud malipay ang pipila? Pagsugod pa lang nila sa pagpaninda, nasayud na sila nga ang merkado dili gayud papuy-an.

* * *

Ingon ba g’yud niini ang sagad mahitabo nga mga security agency moiban sa sweldo sa ilang mga gwardya alang kuno sa Social Security System, Pag-IBIG ug PhilHealth apan dili mo-remit?

Dunay mga gwardya sa Sikatuna Security Agency, apil na kining dia madistino sa among opisina, nga nangreklamo batok sa ilang ahensya. Ang uban kanila miingon nga dugay na sila nga sakop sa ilang ahensya ug ang ilang sweldo kanunay’ng ibanan og para bayad sa SSS. Nahingangha kaayo sila kay ang uban kanila buot na unta nga mo-loan og kwarta sa SSS kay naapike sa ilang sweldo nga tagdugay sab. Apan pastilan, ang uban kanila mipakita og certification sa SSS nga ang ilang ahensya wala na man magbayad sa ilang contribution nga unta kanunay man sila nga giibanan.

May pipila ka gwardya nga mipakita nako sa pay slip niya sa milabay’ng mga buwan, o tuig, nga nagpakita nga giibanan g’yud tuod siya og para sa SSS, Pag-IBIG ug PhilHealth.

Kun tinuod man gani kini, akong awhagon ang tagdumala sa Sikatuna Security Agency nga hinay-hinaya na pag-atiman ang imong obligasyon Sir. Nakuyawan ko nga basin og mag-atubang kamo og problema karong pipila ka adlaw.

Huna-hunaa kuno ninyo, apil na kamong mga staff niining maong ahensya, ang sitwasyon sa gwardya.

Kamo’y anaa sa ilang lugar unya sila maoy anaa sa opisina unya dili tarungon ang pagpanweldo ingon man ang pag-remit sa ilang mga deductions. Sugot kaha mo?

Dili ba kaha maisip nga estafa ang pagkobra og mga contributions apan sa milabay’ng mga tuig walay remittance?

Apil nga gireklamo sa mga gwardya ang gidak-on sa ilang sweldo. Tukion nako kini sa umaabot pa nakong lindog.

Nahinumdom lang ko nga dunay balaud nga gilatid sa Republic Act 5487 ug sa lagda sa PADPAO, ang kahugpongan sa mga security agency operators, nga ang deductions dili mosubra sa 20 porsiyento. Sa ato pa, sa matag P1,000 nga kontrata sa usa ka ahensya ngadto sa ilang kliyente dili sila angay nga mokolekta og sobra sa P200. Sabtan ba ninyo?

Ang mga gwardya nga mireklamo nabalaka nga basin og sila pangtaktakon karon nga misugod na sila pagreklamo.

Apan ako sila nga gidasig nga ipatigbabaw ang ilang kaisog aron batukan ang ilang katungod. Alang sa tagdumala sa Sikatuna Security Agency andam kong maminaw sa inyong pagpasabut.