Gisul-an na pud sa iyang kabayot si Floyd Mayweather Jr., human mokakak sa gipaabot unta nilang panagsangka sa garbo sa mga Pinoy nga si Kongresista Manny “Pacman” Pacquiao, karon mipakita og video sa You Tube nga nanghagit ug nanginsulto sa pinoy boxer.
Gihinganlan ni Mayweather si Pacman nga “midget” ug bisan unsa nalang nga klase sa bastos nga mga pulong ang iyang giluwatan. Lakip ang ininglis ni Pacman wala maka-eskapo sa talawan nga boksidor.
Tataw ang motibo ni Mayweather, buot niyang gub-on ang concentration ni Pacman sa umaabot niining away kang Antonio Margarito karong Nobiyembre. Iyang gustong palaguton si Pacman pinaagi sa pagpanginsulto aron dili ni matigayon sa iyang pagpangandam sa pamasin nga mapildi si Pacquiao ni Margarito aron makapadayon siya sa iyang panghambog nga siya maoy labing ngilngig nga boksidor sa kalibutan.
Maayo pay irong buang ni Mayweather bisan di mamaghot kamao pang mama-ak. Si Mayweather paghut lay nag-ayo apan labihan diay ka talawan.
Karon nga na-final na nga si Margarito maoy ikasangka ni Pacman mao pay iyang pagsaba-saba og balik. Mao pay iyang pagpanghagit nga makigsangka ni Pacman.
Apan niadtong gisuwayan og plantsa ang ilang away, bisan unsa nalay lansis niya aron molikay. Karon siya manghagit kay nahibawo man siyang dili na sila magkasangka ni Pacman.
Paita ning la-os nga boksidor nga dili makadawat nga duna pay mas maayong laki kay niya. Ako pay Mayweather maghikog siya sama ni Edwin Valero.
* * *
Congratulations sa tanang mga opisyal sa Kapisanan ng mga Brodkaster ng Pilipinas sa laing malampuson nga pagbukas sa Broadcasters Month sa miaging weekend. Ang kalihukan gibuksan pinaagi sa mga paugnat sa kusog niadtong Sabado ug sa ika-duhang broadcasters congress kagahapon.
Akong pahalipay sa mga lider sa KBP-Cebu Chapter pinangulohan ni Sir Carlo Dugaduga ug sa ubang aktibong opisyales sama nilang Sir Leo Lastimosa, Atty. Ruphil Bañoc ug sa akong manager sa dyLA nga si Jun Tagalog.
* * *