Goodbye Atty. Rosaroso

Dunay panultihon nga ayaw pagdahum nga ang tanang mga panday nindot og mga balay.

Duna sa’y mga doktor nga wala masayud nga may sakit diay sila nga gihambin.

Patay na ang ilado kaayo nga magsisibya, ang nabantug nga doktora ug abogada Lourdes Libres-Rosaroso.

Usa siya ka inila nga radio announcer sa lainlaing mga sibyaanan dinhi sa Sugbo sa iyang tulomanon – Kini ang Akong Suliran.

Masakit man o problema nga legal iyang hatagan og tambag kay may katakus man siya tungod sa duha niya ka nahuman nga kurso.

Apan nasurpresa ko pagkasayod nga si doktora Rosaroso karon na lang bag-o masayud nga duna siya’y kanser sa totoy. Stage-four na ang kanser dihang nabantayan mao nga wala na siya makalikay.

Gihulagway sa iyang mga sinagop ug mga katabang nga maayong tawo si doktora Rosaroso.

Bisan og pintok kaayo’g tingog si Rosaroso diha sa radyo apan malumo diay kini og kasing-kasing nga dali ra kaayo nga malooy.

Usa ka katabang ni Rosaroso mitug-an sa DYLA nga sa panahon nga sila magkaproblema kabahin sa kwarta, anaa dayon ang ilang agawon nga motabang pagsulbad.

Kay wala may anak si Rosaroso, nanagop kini og iyang mga pag-umangkon nga iyang gipatungha. Gani ang usa sa iyang mga sinagop milampos man g’yud ug nahimo usab nga doktora.

Buyno, Goodbye na lang doktora Rosaroso. Gusto ra ba niya sa wala pa siya mamatay kaniadtong miaging kaadlawon nga ipaagiw ang iyang patay’ng lawas.

* * *

Gipakigbatukan g’yud sa kadagkoan sa Philippine Airlines Employees Association (PALEA) ang tinguha sa PAL nga pangtaktakon sa trabaho ang kadaghanan sa ilang kaubanan aron agency na ang kuhaon nga mo-supply og mga kawani.

Alang kanako, dili makaayo sa mga trabahador ang paghimo nga kontraktwal sa pamaagi sa pag-empleyo, apan duna usahay higayon nga kini makapalambo sa serbisyo.

Tan-awa kadtong mga karaang kawani sa Visayan Electric Company nga mga lalaki nga maoy nagdumala sa pagdawat sa bayad gikan sa ilang mga konsumidor, pwerteng langaya motrabaho.

Karon nga gipangilisan sila og mga batan-on ug mga mamolds nga mga babaye, aw dili ka na abtan og singko minutos sa pagbarug, makahuman ka na sa pagbayad.

Ang ako basta bayaran ka lang sa tukma nga rate, basi sa balaud, walay problema.

Ang paagi nga kun pugson ka pagpa-resign usa ka buwan nga sweldo matag tuig sa imong pagtrabaho ug ibasi ang kantidad sa labing uwahi nimong sweldo.

Ang mga employer gud dili gayud mawili sa mga kawani nga magtinapolan sa ilang trabaho. Daghan man gud usab nga mga kawani nga maayo lang kun mangaplay pa, madawat na gani tapolan pa’s nangamatay.

Dili ba gud tinuod?

* * *

Daygon nako si kanhi Konsehal Hilario Davide III kay andam siya nga moserbisyo isip consultant ni Konsehal Margot Osmeña nga walay sweldo.

Mao nay tawo, dili sama anang uban diha nga mga walay uwaw. Bisan walay trabaho dawat lang gihapon og honoraryom. Klaro kaayo nga political accomodation ra ang gihimo nga pag-hire ninyo uy.

Tan-awa ra gud nang inyong accomplishment kun dili ba kamo mauwaw? Kamo usab nga mga opisyal, mga konsehal, apil na ang mayor, ayaw sab mo pag-usik-usik sa kwarta nga iya sa katawhan.

Ang pag-hire og consultant himoon lang kun ang iyang kinaadman wala kini diha sa mga kawani sa city government. Nalimot ba kamo og unsay lagda?