EDITORYAL - Resulta sa bati nga neuro-psychological test

Samtang nahimong sumsoman sa mga estorya ang pagpang-torture sa usa ka polis ngadto sa usa ka dinakpan pinaagi sa paghikot og pisi sa iyang kinatawo samtang birabirahon kun aduna siya’y ipatug-an, mitumaw ang usa ka estudyante sa criminology sa usa ka unibersidad ug mireklamong gikulata sa iyang maestro nga ahente sa Philippine Drug Enforcement Agency (PDEA-7).

Ang second year criminology student sa University of Cebu-Main Campus nga si Edgardo Martinez, 20, taga Misamis Occidental, gibira sa duha niya ka kamot ug giyatakyatakan sa ulo, gitunobtunoban sa iyang bukobuko ug gitamaktamakan iyang paa sa commandant sa Criminology Department nga si Agent 3 David Mark Maramba sa PDEA-7.

Wala pa matagbaw si Maramba, gipapriso pa gyud niya og tulo ka adlaw si Martinez sa Carbon Police Station. Ang tinun-an pa ang gikulata ni Maramba, mao pa gyud ang iyang gikasuhan og direct assault hinungdan nga nabilanggo gyud sa City Jail niadtong Agosto 4 ug nakagawas niadto lang Agosto 11 human gipiyansahan og P12 mil sa iyang igsuon.

Ang pabilo sa tanan mao lang ang ariyos sa estudyante nga gipahubo sa police intern.

Ingon ba diay niini ka-isog ang mga awtoridad karon?

Ibutang nato og misukol si Martinez sa dihang gibadlong sa intern ug ni Maramba, apan dili kinahanglang maltratohon ilabi na nga usa siya ka tinugyanan sa PDEA-7 ug ang mga tinun-an, sama sa publiko, nagtan-aw kaniya isip tawo nga adunay awtoridad.

Dili ba kaha kini sa kahuyang sa screening sa mga aplikante sa pagka-polis ug sa pag-ahente sa PDEA-7 ug sa ubang mga law enforcement agency mao nga aduna gyuy ilang mga sakop nga ang ilang psychological condition dili haum sa ilang trabaho?

Higayon na tingale nga estriktohon ang neuro-psychological test alang sa mga aplikante sa Philippine National Police, PDEA-7, National Bureau of Investigation, Bureau of Penology and Management, Bureau of Fire Protection ug uban pang ahensiya nga tigpatuman sa balaod aron ma-iban-ibanan, kun dili man mawala, ang mga isog, abusado ug bayolenteng mga polis, ahente sa PDEA ug NBI, bombero ug jail personnel.

Kun ma-estrikto na ang neuro-psychological test, wala nay opisyal sa kapolisan nga managpa og reporter, wala nay polis nga manghikot sa kinatawo isip paagi sa torture, wala nay sama ni Maramba nga mangyatakyatak sa uyang estudyante.

Kay ang ahente sa balaod kanunay'ng anaa sa maayong kondisyon sa pangutok, bisan unsa pa ang sitwasyon.