Kremin ang ngalan sa politiko diha sa proyekto

Normal na nga talan-awon dinhi sa atong nasud nga ang mga proyekto sa gobyerno butangan sa mga pangalan sa mga politiko nga maoy naglingkod sa gahom atol sa pagkatukod niini.

Dili na bag-o alang nato kun ang dagway sa mga mayor, kongresista ug gobernador atong makit-an nga ihaklap diha sa ilang mga proyekto.

Dugay na ko nga nahinaway sa maong paagi sanglit mogawas nga dakong insulto sa mga magbubuhis nga ang proyekto nga gigastuhan sa atong kwarta angkunon sa usa ka politiko’ng baga og nawong.

Salamat nga dunay desente nga politiko sama ni Senador Francisco “Chiz” Escudero nga nakahuna-huna nga ang paghimo sa ingon usa ka dakong sayop ug maisip nga kremin.

Si Escudero miduso sa usa ka balaudnon didto sa Senado ang Senate Bill No. 2187 nga nagtinguha pagdeklarar isip usa ka kremin ang pagbutang sa pangalan sa usa ka politiko diha sa ilang mga proyekto.

Sa maong balaudnon, buot ni Escudero nga masilotan og usa ka tuig nga pagkapriso ug ingon man multa nga P100,000 ngadto sa P1 milyon depende sa gidak-on sa proyekto ang mga makalapas niini.

Lakip sa mga gidili na pagbutang sa mga pangalan mao ang mga sakyanan nga gipalit sa gobyerno. Pipila lang niini mao ang mga ambulansiya ug uban nga mga gigamit isip service vehicle sa gobyerno.

Matud ni Escudero nga pinaagi sa maong mga sakyanan ug mga proyekto daw sa nagsigi og pangampanya ang mga opisyal tibuok tuig.

Dalaygon kaayo ang maong balaudnon apan nabalaka ko nga dili ni molusot sa plenaryo. Nagduda gani ko nga way bisan usa ka kongresista nga mosang-at og ilang version sa balaudnon.

Sagad man gud sa guilty niini gawas sa mga lokal nga mga opisyal mao man ang mga kongresista. Dinhi pananglitan sa dakbayan sa Sugbo, lingi-a og suway pila ka mga skywalk ug flyovers nga gisiprahan sa pangalan sa mga kongresista?

Kun molampus man ang maong balaudnon nahadlok pud ko nga way gustong mopatuman niini. Sigurado gyud ko nga kun istrikto nato ning ipatuman way mahabilin sa atong mga lokal nga opisyal, silang tanan pulos makalabuso.

* * *

[email protected]