CEBU, Philippines - Ato na kining nadaklitan paghisgot dinhi ning atong lindog. I don’t know if my memory serves me right, apan, kining mga laraw ni Vice Mayor Joy Young, pagpalit og mga eroplano alang sa dakbayan, dili kini bag-o alang kanako. Si Serging Osmeña, sa iyang pagka-Kongresista, tapus siya ma-Gobernador sa lalawigan ug pagka-Mayor sa dakbayan, ug sa wala pa siya ma-Senador, misugyot, o mipasaka ba gyud og balaudnon, pagpalit og helicopter alang sa dakbayan sa Sugbo. Kini sa mga tuig 1950s, o early 60s, sa ato pa, daghan sa karon nanaway ug nangantalita ni Joy Young ang wala pa matawo. Atong makita dinhi, unsa ka advance si Serging Osmeña sa iyang mga panglantaw. Imagine, 1950s naghunahuna na siyag palit og helicopter. Ug karon, atong kataw-an si Joy Young sa maong hunahuna? Pagka-backward gud nato. Kun buot hunahunaon, this is long overdue.
Ang international airport, ug ang Mactan bridge, kang Serging kini nga mga laraw. Gani, maoy iyang plano nga inigbawi na sa Hong Kong gikan sa Britain, iyang himoon nga free port ang Mactan Island. Sa among panahon, kataw-anan ug subra ka ambisyuso, lisud tumanon nga mga laraw. Alang kanamong taga-Opon, sa elementarya pa tingali mi adto, imposible gyud kaayo ang taytayan nga mag-connect sa Opon ug mainland Cebu. Ug daghan ang nangasuko ngano kuno nga ibalhin man ang Lahug airport ngadto sa Opon.
Mora po’g SRP nga daghan ang nangduda kun magmalampuson ba kini. Tom Osmeña, anak ni Serging, had the last laugh.
Anyway, nakalitan tingali ang House of Representatives sa laraw ni Serging, kay alang nila nagpasagad la’g damgo si Serging, gi-turn down ang sugyot ni Serging. Diha pay laraw ni Serging, sa Gobernador pa siya pag-semento sa circumferential road sa tibuok lalawigan., on a BOT scheme, apan, wa gihapon aprobahi sa national government.
Ang helicopter, alang unta kadto sa peace and order, pag-monitor sa environment, rescue operation, ug ubang kagamitan ug katuyoan.
Suma sa atong makita sa mga movies, ang police, ang coast guard, ang FBI , dunay mga helicopter. Dinhi sa ato mabawo tag panghuwam sa ABS-CBN kun gusto tang motan-aw sa tibuok lalawigan gikan sa kapanganoran. Akong usbon, kining laraw ni Joy Young, long overdue na ni. Kun maka-afford lang ta, maayong ipadayon ang pagpalit og eroplano.
Ayaw lang pod nang kagang-kagang. Kay tingali unyag maatol nga ang taga-media nga misaway niini, maoy sakay, unya, maoy i-crash, na, dakung tulobagon sa city hall.