Mitumaw ang balitang adunay planong paliton sa Cebu City government ang tulo ka karaang abyon sa Department of Education aron gamiton sa mga rescue operations, coastal management ug uban pa sa dakbayan.
Nindot paminawon nga adunay abyon ang usa ka siyudad kay usa kini ka pagpakita nga maka-afford gyud sila nga makaangkon niini. Dako kining dungog dili lang sa mga opisyal kondili lakip na sa mga molupyo.
Apan angayang huna-hunaon una sa mga opisyal kun importante ba gyud kini kaayo. Dili ba nila mahimong mas maepektibo sa rescue operations ug coastal management kun wala niini?
Aduna naman kitay daghang rescue groups gikan sa Bureau of Fire Protection(BFP), Philippine Coast Guard(PCG), Armed Forces of the Philippines(AFP) ug mga civilian rescue volunteers, kining maong mga grupoha pulos adunay mga kaugalingong ekipo.
Ang coast guard usa sa gitahasan sa atong gobiyerno sa coastal management, ang BFP adunay rescue equipment samtang ang AFP kanunay man andam mopagamit sa ilang mga abyon kun gikinahanglan.
Asa man patugpahon ning mga abyon diha sa kabukiran nga wala may airstrip sa mga kabarangayan nga katugpahan. Dili parehas sa helicopter nga bisan duha ka basketball court makatugpa na kini, ikaduha ang fixed-wing aircraft dili epektibo panahon sa bagyo.
Laing problema niini mao ang maintenance sa mga abyon, pag-hire og piloto, pagpalit og fuel ug ang pag-abang og hangar diha sa airport diin kini hipuson kun dili gamiton.
Nindot man unta ang offer sa mga opisyal nga bayran nila kini pinaagi sa pagtukod og mga school buildings sa dakbayan.
Dili ba mas maayo kun ang ipagawas nga pundo ipatukod nalang diretso og public school buildings ug ang gipaabot nga gastuson sa maintenance sa mga abyon ihapak nalang gihapon ngadto sa pagpalit og mga gamit sa mga tunghaan ug idugang og suporta ngadto sa mga existing nga mga rescue units?