Prostitusyon sa party-list system

Gipalingkod na sa Commission on Election si kanhi Kongresista Mikey Arroyo, anak ni kanhi pangulong Gloria Macapagal Arroyo isip representante sa Party-list Group, Ang Galing Pinoy. Kini human ibasura sa nahisgutang buhatan ang petition nga giduso sa Bayan Muna ug Gabriela nga nagpadiskuwalipikar ni Mikey Arroyo. Si Mikey Arroyo mao ang dala sa tingog sa grupo sa mga gwardiya, driver ug mga gagmay’ng manindahay.

Gihimong borikat sa Commission on Election ang Party-list System sa nasud tungod sa iyang pagtugot ni Mikey nga makalingkod isip representante sa mga security guard, drivers ug mga gagmay’ng maninday.

Ang Party-list system gituyo sa pagbutang diha sa atong batakang balaud agi og kausaban sa representasyon sa ubos balay balauranan. Tumong ug tuyo niini aron mapalapdan ug mahatagan og tingog ang mga gagmay’ng molupyo sa nasud apan ang nahitabo gisakyan hinoon kini sa mga tawong hakog sa gahum.

Tungod sa ka-mahal sa pag-apil sa party-list election ug aron makaseguro nga makakuha og representasyon, nag-prostitute ang ubang party-list groups, ilang gibaligya ang ilang nakuhang representasyon. Aduna usay party-list groups nga dummy lamang sa mga politikong hakog sa gahom ug mao kini ang pagduda sa grupong nagpadiskwalipikar ni Mikey Arroyo. Sila nagtoo nga ang Ang Galing Pinoy dili gayod tinood nga kahugpongan sa mga guwardiya, drivers ug mga tindero ug tindera.

Sa pagkakaron upat na ka mga Arroyo ang maglingkod sa ubos balay balauranan nga gilangkoban sa inahan, kongresista Gloria Macapagal Arroyo ug mga anak Mikey Arroyo ug Datu Arroyo. Kauban usab nila si Eggy Arroyo ang igsoon ni kanhi unang ginoo Mike Arroyo.

* * *

Nisugod naman tood pagbalik ang bista sa kaso ni Ruben Ecleo apan hinay lang gyod gihapon kini. Usa sa matumbok nato nga nakapahinay sa dagan sa kaso ni Ecleo mao ra usab ang prosecution nga porbidang daghanang koskos balungos, dili na lang gyod moangkon nga naglisod gyod sila sa pag-prosecute ning kasong Ecleo.