Dili maayong i-postpone

Daghan ang mga panawagan pag-postpone sa eleksiyon sa barangay ug Sangguninang Kabataan sa Oktubre. Gani aduna nay mga gipasaka didto sa Ubos Balay Balauranan pag-reset sa maong piniliay.

Kini gumikan lagi sa rason nga dako og nagasto ang gobiyerno sa nakalabay’ng presidential election tungod usab sa pagsagop sa nasud sa modernong paagi. Ug kun idayon gayud ang eleksiyon sa Oktubre, siguradong galastohan na usab kini sa kagamhanan.

Apan kun atong subayon ang balaod, mahinayon gayud ang eleksiyon sa Oktubre. Kini bisan pa man kun dako ang magasto sa gobiyerno. Nalatid kana sa balaud ug angay kana’ng sundon.

Apan kun wala gayu’y pundo alang niini, angay lamang usab nga ihikling una ang pagpahigayon sa barangay ug SK elections. Hinuon kadaghan na nga na-postpone ang maong piniliay kaniadto. Kini tungod sa daghang rason sama sa kakulangan gayud sa pundo.

Alang kanako, wala ako’y nakita nga rason ngano nga dili gayud idayon ang maong eleksiyon sa Oktubre. Kay kun kulang sa pundo ang rason, taphaw kana nga konklusyon.

Ang giingong kakulangan sa pundo lisod gayud nga tuohan. Dili ko motuo nga mihubas na ang panudlanan sa gobiyerno human sa national elections kaniadtong Mayo 10.

Kun nakapahigayon ang kagamhanan og piniliay sa niaging Mayo, nganong dili man madayon ang eleksiyon karong Oktubre? Nalatid kana sa balaod ug angay lamang kana nga sundon.     

Kun tinud-anay nga nahubsan na sa pundo ang gobiyerno ug dili na kaya niini ang pagpahigayon sa eleksiyon sa barangay ug SK karong tuiga, nganong dili man kibhangan ang mga pork barrel sa mga kongresista ug senador ug maoy igasto sa bugnong lugaynon?   

Usa pa, mas angay usab nga ma-automate ang eleksiyon karong Oktubre aron pagminos sa gasto. Kay kun manual nga paagi kini, hayan dako na usab og gasto ang pag-hire og dugang personnel alang pag-ihap sa mga balota.

Kini wala pay labot sa kadugay sa panahon pag-ihap sa mga balota dala niining manual nga sistema. Kana mao lamang ang makalangay unya pagdeklara sa mga mananaug.

Hinuon, nasugdan na man ang automated nga piniliay dinhi sa nasud, nganong mobalik pa man kita ngadto sa manual nga sistema? Wala koy nakitang maayong rason ngano nga mobalik pa kita ngadto sa karaang pamaagi sa pagpahigayon unya sa eleksiyon sa barangay ug SK.

* * *

Akong itunol ang mainit nga pahalipay ngadto kang Brod Benny Cataag sa Ormoc City kinsa nagsaulog sa iyang adlaw’ng natawhan kaniadtong Hulyo 7. Inila si Brod Benny didto sa ilang dakbayan tungod sa iyang maayo ug ligdong nga posisyon sa sosyidad isip usa ka negosyante.  

Usa sa mga haligi si Brod Benny sa among fraternity, ang Alpha Theta Omega, didto sa Samar ug Leyte. Gani milambo ang among kapunongan sa maong mga dapit tungod usab sa iyang mga paningkamot.

So, ngadto kang Brod Benny happy birthday kanimo ug hinaut nga daghan pang grasya ang imong madawat gikan sa Kahitas-an.

Magkita unya ta sa atong anibersaryo karong Nobiyembre. 

* * *

Email: [email protected]